Өглөө.мн Шинэ өглөө, Шинэ мэдээлэл
Засгийн газар хэдхэн хоногийн өмнө Ковакс хөтөлбөрийн хүрээнд 100 мянган тун Файзер вакцин хүлээн авсан, үргэлжлүүлэн 2.5 сая тунг худалдан авах гэрээ хийгээд байна. Тус вакциныг 12-17 насны хүүхдүүдэд хийхээр төлөвлөөд байгаа билээ.
Эрүүл мэндийн сайд С.Энхболд энэ сарын 2-ны өдөр мэдээлэл хийх үеэрээ “ Одоогоор дэлхийд Европын холбоо болон Канад, Америк гэх мэт улсуудад 12-15 настай хүүхдүүдийг вакцинжуулаад эхэлсэн байгаа. Манай улс ч 12-17 насны хүүхдүүдийг Pfizer вакцинаар вакцинжуулах төлөвлөлт хийж байна. Хэрвээ 12-17 насны 290 мянган хүүхдэд вакцин хийвэл нийт хүн амынхаа 68.6 хувийг вакцинд бүрэн хамруулна гэсэн тооцоолол байна.
Дэлхийд халдвар авсан хүмүүсийн 13 хувь буюу 11 сая хүүхэд байгаа бол манай улсад 13197 хүүхэд халдвар авсан байна. 0-17 насны хүүхэд халдвар авах нь нэмэгдэж байна. Энэ нь хүүхдүүдэд вакцин хийгээгүй байгаатай холбоотой гэж үзэж байна. Өдөрт нийт батлагдаж байгаа тохиолдлын 26-30 хувийг хүүхдийн халдвар эзэлж байгаа”хэмээн мэдэгдсэн билээ.
Хүүхдүүдийн вакцины талаар Улаанбаатар Сонгдо эмнэлгийн ерөнхий захирал Б.Болдсайхан сууриа илэрхийллээ.
Тэрээр “Шинжлэх ухаан гэдэг шашин шиг юм биш. Маш олон судалгааны төв, олон хүнд хийгээд гарсан үр дүнгээ л ярьж байгаа. Ковид бол дэлхийд анх удаа гарч байгаа. “Би анх удаа амьдарч байгаа учраас алдах эрхтэй” гэж бид ярьдаг. Монголчууд ч алдаж байгаа. Иргэд ч алдаж байгаа. Сүхбаатарын талбай дээр хэдэн мянгаараа үнсэлцээд байж байна. Засгийн газар ч алдаж байгаа. Америк ч алдсан. Америк ямар байсныг та нар санаж байгаа байх. Хүнээ тавих газар байхгүй Дэлхийн II дайны үе шиг массаар нь оршуулж байсан. Бүгд алдаж байгаа, гэхдээ хамгийн бага алдах ёстой. Яагаад гэхээр энэ алдааны цаана хүний амь байдаг. Хүний өвчин зовлон, уй гашуу байдаг учраас хамгийн бага алдах ёстой. Бид бусад орнуудтай харьцуулаад байгаа нь тэдний алдаанаас суралцах ёстой. Вакцин тариулаад маргааш нь ид шидтэй болоод, гадуураа хуяг хийчихсэн юм шиг болж байгаа юм биш. Мөн огт өвдөхгүй гэсэн үг биш. Вакцин тариулсан, тариулаагүй бүх хүнд вирус орж ирж байгаа. Дэлхий даяар вакцин хийлгэсэн хүмүүсээс нэлээд өндөр хувь буюу 4-5 хувь нь халдвар авч байгаа. Зарим оронд үүнээс ч өндөр байгаа. Монголд харьцангуй бага.
Азаар Монголын Засгийн газар маш сайн ажилласан. Би иргэн хүнийхээ хувьд, эмчийнхээ хувьд Монголын Засгийн газарт, Ерөнхий сайдад, Гадаад харилцааны сайдад, Сангийн сайдад, УОК-т бүгдэд нь талархмаар байна. Монгол баян тарган, чадалтай улс биш. Эдийн засгийн хувьд ч, эрүүл мэндийн системийн хувьд ч тэр. Засгийн газар, Эрүүл мэндийн яам, УОК сайн ажиллалаа, иргэд ухамсартай хандаж вакциндаа ингэж сайн хамрагдаагүй байсан бол тархвар судлаачдын тооцоолж байгаагаар доод тал нь өдөртөө 10-20 мянган хүн өвдөөд, 1000-аас дээш үхэлтэй байх байсан. Бүх эмнэлэг дүүрээд жилийн өмнөх Итали, Герман, Франц, Америк шиг зөвхөн үхэх гэж байгаа хүнээ аппаратад авна. Зарим нь аваад ч нэмэргүй гэдэг дээрээ тулаад улс даяараа эмгэнэлтэй байдалд байхаар байсан. Хоёр сая хүнээс өдөрт 1300 гэдэг их бага хэмжээ. 0.3 хувь байна гэсэн үг. Энэ бол байх ёстой л үзэгдэл. Хоёрдугаар тунгаа хийлгэсэн хүмүүсийнх бүр бага байгаа. Вакцинаа хийлгэсэн хүмүүс хүндэрч, өвдөх нь харьцангуй бага, бараг байхгүйтэй адилхан. Хоёр сая хүнд вакцин хийхэд тодорхой хэсэг нь өвдөнө, хүндэрнэ, нас барна. Вакцин хийлгээгүй хүмүүс бүр илүү эрсдэлтэй. Зургадугаар сарын 1 гэхэд Улаанбаатарт хоёрдугаар тунгаа хийж дуусна гэж байгаа. Тэглээ гээд өвдөлт бүр алга болохгүй. Тэр байтугай энэ зун, энэ намар алга болохгүй.
Сүүлийн үед хүүхдийн халдвар нэмэгдэж байна. ЭМЯ-ны өгч байгаа мэдээллээр сүүлийн үед 50,60 хувь нь хүүхдүүд өвдөж байна. Монгол хүүхдүүдийн орон. 16 хүртэлх насны хүүхдүүд хүн амын 30-аад хувь байгаа. Эдгээр хүмүүст огт вакцин хийгээгүй болохоор халдвар дамжиж байна. Харамсалтай нь сүүлийн үед хүүхдүүдээ таргалуулдаг болсон. Чихрийн шижинтэй, суурь өвчтэй, дархлааны өөрчлөлттэй хүүхдүүд их болсон. Засгийн газрыг магтдагийн учир нь наймдугаар сарын дундуур хичээлийг эхлүүлнэ гэсэн. Түүний өмнө хүүхдүүдээ вакцинжуулна гээд хамгийн үнэтэй, хүндрэл бага Пфайзерыг эхнээсээ оруулж ирж байна. 1.3 сая хүүхдээ өвтгөхгүй, хүндрүүлэхгүй, үхүүлэхгүй гэж бодож байгаа бол вакцин хийлгэхээс өөр арга байхгүй. Хамгийн аюулгүй, гайгүй вакцин нь Пфайзер гэж байгаа. Тиймээс би Засгийн газарт талархмаар байна. Хамгийн түрүүнд би 15-тай хүүгээ аваачиж хийлгэнэ. Яагаад гэвэл би хүүгээ битгий өвдөөсэй, хүндрээсэй, үхээсэй гэж хүсч байна. Хоёр сая том хүн вакцин хийлгэчхээд яагаад хүүхдүүдээ хамгаалахгүй байгаа юм. Эхнээсээ өвдөөд үхээд байна ш дээ. Эднийхээ төлөө хамгийн үнэтэй вакцин оруулж ирж байгаад талархмаар байна” гэлээ.
