Хүндийн өргөлт:МУГТ М.Анхцэцэг медалийн төлөө өрсөлдөж, дөрөвдүгээр байр эзэллээ

Хүндийн өргөлтийн 87 кг-д өрсөлдсөн Монгол улсын гавьяат тамирчин М.Анхцэцэг медалийн төлөө өрсөлдөж, дөрөвдүгээр байр эзэллээ.

Манай тамирчин огцомоор 110 кг-ыг өргөсөн амжилтаар тавд бичигдэж байсан. Улмаар түлхэлттэй өргөлтийн хоёр дахь оролдлогоороо 142 кг-ыг өргөж, дөрөвт орж ирсэн.

Түүний хувьд хүрэл медаль хүртэхийн тулд 147 кг-ыг өргөх ёстой байв. Ингээд 147 кг-ыг захиалж, медалийн төлөө эцсээ хүртэл тэмцэхээр болсон. Харамсалтай нь захиалгаа өргөж чадалгүй алдаж, дөрөвдүгээр байр эзэллээ.

Монгол улсын гавьяат тамирчин М.Анхцэцэг маань хэдийгээр медаль хүртэж чадаагүй ч олимпын наадмын дөрөвдүгээр байрт шалгарна гэдэг том амжилт юм. Монголчуудын олимпоос медаль хүртдэг ТОП 4 төрөл удахгүй тав болж нэмэгдэх боломжтой гэдгийг МУГТ М.Анхцэцэг маань тод томруун харуулж чадлаа.

М.Анхцэцэгтээ цаашдын замналд нь амжилт хүсэж, “Парис-2024” Олимпод дутуугаа гүйцээхийн ерөөл дэвшүүлье!