Өглөө.мн Шинэ өглөө, Шинэ мэдээлэл
М.НАНДИН-ЭРДЭНЭ ӨСВӨР ҮЕИЙН ДАШТ-ИЙ ХҮРЭЛ МЕДАЛЬТАН БОЛЛОО
“Сараево-2022” жүдо бөхийн өсвөр үеийн Дэлхийн аварга шалгаруулах тэмцээнд манай улсаас 16 жүдоч хүч үзэж байгаа бөгөөд охидын 48 кг-ын жинд энэ жилийн өсвөр үеийн Азийн тивийн аварга Мягмарсүрэнгийн Нандин-Эрдэнэ хүрэл медаль хүртлээ.
М.Нандин-Эрдэнэ Сараевод нийт таван барилдаан хийсэн бөгөөд медальтай үлдэх эсэхээ шийдэх хариуцлагатай барилдаанд Италийн Илария Финестроныг вазари үнэлгээгээр ялснаар шагналын тавцанд зогсов.
М.Нандин-Эрдэнэ нь Токиогийн олимпийн наадмыг дэнсэлсэн, олон улсын шүүгч Т.Энхцэцэгийн шавь.
Сараевод болж буй жүдо бөхийн өсвөр үеийн ДАШТ-ий ганцаарчилсан төрлийн барилдаанууд өндөрлөлөө.
Манай улсаас охидын +70 кг-ын жинд зодоглосон 2021 оны өсвөр үеийн Азийн АШТ-ий хүрэл медальт, Хан-Уул дүүрэг, “Женко” клубийн тамирчин Батсуурын Ням-Эрдэнэ хүрэл медалийн эзэн боллоо.
Тэрбээр нийт 5 барилдаан хийсэн бөгөөд хүрлийн төлөөх барилдаанд Украины Диана Семченког торгуулиар цэвэр ялснаар Сараевогоос Монголын жүдочдоос хоёр дахь хүрэл медалийг эх орондоо авчирсан.
