Нийслэлийн 383 жилийн ойн барилдаанд улсын аварга О.Хангай түрүүллээ

Монгол Улсын нийслэл Улаанбаатар хот үүсэн байгуулагдсаны түүхт 383 жилийн ойд зориулан улс, аймгийн алдар цолтой 256 бөхийн барилдаан болж өндөрлөлөө.

Ийнхүү хүчит 256 бөхийн барилдаанд Ховд аймгийн Буянт сумын харьяат Монгол Улсын аварга Оргихын Хангай түрүүлж, Баян-Өлгий аймгийн Улаанхус сумын харьяат улсын заан Бердимуратын Серик үзүүрлэв.  

Нийслэлийн ойн өдөрт зориулан жил бүр тогтмол зохион байгуулдаг уг барилдаан “Ковид-19” цар тахлын улмаас өнгөрсөн жил завсарлаад байсан. Энэ жилийн хувьд НЗДТГ, Нийслэлийн Биеийн тамир, спортын газар, Монголын Үндэсний бөхийн холбоотой хамтран зохион байгуулав.

Бөхийн барилдааны дунд шөвгийн наймд улсын аварга П.Бүрэнтөгс, О.Хангай, улсын арслан Р.Пүрэвдагва, улсын заан Б.Пүрэвсайхан, Б.Серик, улсын харцага Б.Зоригтбаатар, Б.Цэдэнсодном, Ц.Мөнхбаяр нар шалгарсан юм. Харин их шөвгийн дөрөвт улсын аварга О.Хангай, улсын заан Б.Серик, улсын харцага Б.Цэдэнсодном, Ц.Мөнхбаяр нар тунан үлдсэнээс ийнхүү шинэ аварга О.Хангай найм даван түрүүллээ.

Улаанбаатар хот үүсэн байгуулагдсаны түүхт ойн өдөрт зориулан үндэсний бөхийн барилдааныг 1994 оноос хойш зохион байгуулж байгаа бөгөөд тухайн оны барилдаанд дархан аварга Б.Бат-Эрдэнэ түрүүлж, улсын аварга О.Балжинням үзүүрлэж байсан түүхтэй.