Өглөө.мн Шинэ өглөө, Шинэ мэдээлэл
Нийтийн биеийн тамирыг хөгжүүлэх, хүүхэд залууст спортоор хичээллэх, чөлөөт цагаа зөв боловсон өнгөрүүлэх боломжийг бүрдүүлэхэд нийслэлийн зүгээс онцгой анхаарч буй.
Энэ хүрээнд НЗДТГ, Монголын 3×3 сагсан бөмбөгийн холбоо хамтран “Улаанбаатар кап” 3×3 сагсан бөмбөгийн тэмцээнийг энэ сарын 22-ноос зохион байгуулна.
Нийслэлийн Засаг даргын Захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ: Нийслэлийн иргэд, тэр дундаа хүүхэд залууст биеийн тамир, спортоор хичээллэх боломжийг бүрдүүлэхээр есөн дүүрэгт 3×3 сагсан бөмбөгийн 118 талбай байгуулах ажлыг эхлүүлсэн. Өнгөрсөн онд 34 талбайг ашиглалтад оруулсан бол энэ жил 40 талбай байгуулахаар төлөвлөж байна. Ирэх жил мөн энэ ажил үргэлжилнэ.
Тэгэхээр сагсан бөмбөг сонирхогчдод олон улсын стандартад нийцсэн талбайд тоглох боломж бүрдэж буй. Энэ нь иргэдэд амьдралын эрүүл хэв маягийг хэвшүүлэх, спортоор хичээллэхэд нь нөлөөлнө хэмээлээ.
Монголын сагсан бөмбөгийн холбооны ерөнхий нарийн бичгийн дарга С.Төгсжаргал:НЗДТГ, Монголын 3×3 сагсан бөмбөгийн холбоотой хамтран өнгөрсөн жилээс эхлэн уг тэмцээнийг зохион байгуулж байна. Энэ жилийн “Улаанбаатар кап”-ын хүрээнд нийслэлийн есөн дүүргийн аварга шалгаруулах тэмцээн дөрөвдүгээр сарын 22-ноос эхлэн амралтын өдрүүдээр Д.Сүхбаатарын талбайд болно. Тавдугаар сарын 21-нд аваргуудын аварга буюу финалын тэмцээнийг зохион байгуулах юм. Энэ тэмцээнд ялсан баг долоодугаар сард болох Макаод болох “ФИБА 3×3 Макао” дэлхийн их дуулгын тэмцээнд оролцох эрх авна. Монголын 3×3 сагсан бөмбөгийн холбооны сошиал хуудсуудаар мэдээлэл өгч, багуудын бүртгэлийг тэмцээн болохын өмнөх өдөр зохион байгуулна.
Ангиллын хувьд нас хүрэгчдийн эрэгтэй, эмэгтэй гэсэн ангиллаар зохион байгуулах тул 16-аас дээш насны хэн бүхэн оролцоход нээлттэй. Спортын энэ төрлөөр манай тамирчид өндөр амжилт гаргасаар байна. Цаашид олон хүүхэд, залуус 3×3 сагсан бөмбөгийн спортоор хичээллэх суурийг тавьж, стандарт талбайнуудыг байгуулж байгаад талархал илэрхийлье гэсэн юм.
