Ардын жүжигчин Э.Амартүвшин Дуурийн шилдэг баритон дуучнаар шалгарлаа

Ардын жүжигчин Э.Амартүвшин Олон улсын дуурийн  найм дахь удаагийн шагнал болох “Дуурийн шилдэг баритон” шагналын эзнээр хоёр дахь удаагаа тодорчээ. Тэрбээр энэ шагналыг анх 2020 онд хүртэж байв.

Энэ удаагийн шагналд дэлхийн дуурийн урлагийн шилдгийн шилдэг 15 дуурийн дуучдаас хоолой тус бүрээс гурван дуучныг шалгаруулж дэвшүүлснээс Монголын  дуурийн нэрт дуучин Э.Амартүвшин шалгарчээ.

Энэхүү шагналыг Италийн засгийн газар, Италийн Гадаад Харилцааны Яам, Италийн Соёлын яам, өв бүтээл, Аялал Жуулчлалын Яам, Залуучуудын холбоод, Олон улсын дуурийн театруудын хамтарсан холбоод, Симфони найрал хөгжмийн холбоод, Верано хотод үйл ажиллагаатай Арена сан зэрэг мэргэжлийн өндөр статустай олон улсын сонгодог урлагийн сангууд, байгууллагуудаас хамтран ивээн тэтгэн тодруулж зохион байгуулдаг юм.

Монгол Улсын Ардын жүжигчин Э.Амартүвшин П.И.Чайковскийн нэрэмжит Олон улсын дуурийн дуучдын уралдааны дэд байр, 2012 оны Пласидо Домингогийн нэрэмжит уралдааны Гран при, Английн BBC агентлагийн “Cardiff Singer of the World 2015” уралдааны үзэгчдийн нэрэмжит шагнал, БНСУ-ын нийслэл Сөүлд болсон олон улсын тэмцээний гуравдугаар байрын шагнал тус тус хүртэж байв.