Шинээр сэргэсэн ГАДААД ХАРИЛЦАА!

Гадаад харилцааны бодлого Ерөнхийлөгч, Ерөнхий сайд нарын үнэт зүйл, үзэл бодол, характер, харизмаас нь хамаардаг. Энэ утгаараа төрийн гурван өндөрлөгийн хувьд анхны гадаад айлчлалаа хаанаас эхлүүлэх нь ард иргэдийнхээ төдийгүй түнш орнуудын анхаарлын төвд байдаг.

2021 оны долдугаар сар. Л.Оюун-Эрдэнэ гүйцэтгэх засаглалын тэргүүн болсныхоо дараа гадаад төрийн айчлалаа гуравдагч хөршөөс, Монголд үргэлжид сайн санааны гараа сунгаж байдаг Японоос эхлүүлж байв.

Хүн нь хүнээсээ, улс нь улсаасаа жийрхэн, бөмбөрцөг бүхэлдээ хөл хорионд орсон цар тахлын үед тохиосон анхны гадаад айлчлалаа Токиод хийсэн нь олимптой давхцсан, нөгөө талаар монголчуудыг “covid-19”-ийг хохирол багатай даван туулахад нэмэр, хандив өгсөн Японы ард түмэнд талархсан үйлдэл нь байсан биз. Монголчууд царт тахлыг хохирол багатай давах туулахад Японы ард түмний хандивласан “файзер” вакцин багагүй тус нэмэр болсон юм.

Энэхүү айлчлалаар хоёр улсын стратегийн түншлэлийг 2017-2021 онд хөгжүүлэх дунд хугацааны хөтөлбөр амжилттай хэрэгжиж дуусгавар болсныг дүгнээд 2021-2025 онд хэрэгжүүлэх дараагийн дунд хугацааны хөтөлбөрөө тодорхойлсон юм.

2022 оны хоёрдугаар сар. Тэрбээр Бээжингийн өвлийн XXIV олимпийн нээлтийн ажиллагаанд оролцсон агаад “Монгол Улсын экспортын голлох бүтээгдэхүүн болох зэс, коксжсон нүүрсний экспортын 50 гаруй хувийг дангаараа эзэлдэг Гашуунсухайт-Ганцмод боомт болон Шивээхүрэн-Сэхээ, Бичигт-Зүүнхатавч боомтуудын төмөр замын хилийн шугам дайран өнгөрөх цэгийг эцэслэн тохиролцсоноор 14 гаруй жилийн хугацаанд гацсан Гашуунсухайтын төмөр замын өргөн нарийн царигийн маргаан эцэслэгдэж, нүүрсний экспорт гацаанаас гарсан” гэх сайн мэдээтэй ирж байлаа.

Мөн Монгол Улсын нийслэл Улаанбаатар хотын түгжрэлийг бууруулах ажлын хүрээнд БНХАУ-ын дэвшилтэт технологид тулгуурласан тулгуурт гүүрэн байгууламж бүхий нийтийн тээврийн хэрэгслийг нэвтрүүлэх, хурдны тойрог замын сүлжээ байгуулах зэрэг төслүүдэд хамтран ажиллахаар зөвшилцсөн байдаг.

2022 оны долдугаар сар. Сингапур Улсын Ерөнхий сайд Ли Сиен Лүний урилгаар Монгол Улсын Ерөнхий сайд Л.Оюун-Эрдэнэ тус улсад албан ёсоор айлчилсан. Дэлхийн олон улс оронд үлгэр жишээ болсон Сингапур улсын мэдлэгт суурилсан хөгжлийн туршлагыг Монгол Улсад нутагшуулах тухайлбал, Сингапурын хуримтлалын сангийн туршлага, Төрийн өмчит компаниудын засаглалыг сайжруулах, хот төлөвлөлт, нийтийн орон сууцны хөтөлбөр, цахим засаглал, мэдээллийн технологид суурилсан төрийн албаны шинэчлэл, Ухаалаг нэгдсэн системд тулгуурлан авто замын түгжрэлийн асуудлыг шийдвэрлэх чиглэлээр тус улстай хамтран ажиллахаар болсон.

2022 оны аравдугаар сар. ХБНГУ-тай дээд, өндөр түвшний улс төрийн яриа хэлэлцээний давтамжийг хадгалах, харилцан ойлголцлыг бэхжүүлэх, эдийн засаг, худалдаа болон бусад салбарт харилцаа, хамтын ажиллагааг өргөжүүлэх чухал ач холбогдолтой айлчлал болсон гэж олон улсын судлаачид дүгнэж байлаа. Тэрбээр Олаф Шольцтай хэд хэдэн асуудлыг онцлон ярилцсны нэг нь газрын ховор элементийг хагас боловсруулах үйлдвэрлэлийг хэрэгжүүлэхээр хоёр тал судалгааны ажлыг хамтран эхлүүлэхээр болжээ.

Мөн Герман Улстай хамтран эрчим хүч, тээвэр логистик, уул уурхай, мэдээлэл технологи, хот төлөвлөлт, хөдөө аж ахуй, ойн инженер зэрэг 1000 инженерийг үе шаттай бэлтгэх хөтөлбөрийг хамтран хэрэгжүүлэхээр тохиролцсоноос гадна Их долоогийн Дээд хэмжээний уулзалтаар яригдсан дэд бүтэц, хөрөнгө оруулалтын төсөл, хөтөлбөрт Монгол Улс багтаж түншлэн ажиллах, Тавантолгой цахилгаан станц, Дулааны V цахилгаан станц зэрэг томоохон төслүүдэд ХБНГУ хамтрахыг хүссэн байдаг.

2023 оны зургадугаар сар. Монгол Улсын Ерөнхий сайд Л.Оюун-Эрдэнэ Бүгд Найрамдах Хятад Ард Улсын Төрийн зөвлөлийн Ерөнхий сайд Ли Чяны урилгаар тус улсад албан ёсоор айлчилсан. Энэхүү айлчлал нь Монгол, Хятадын Иж бүрэн стратегийн түншлэлийн харилцааг өргөжүүлэн хөгжүүлэх, бүхий л салбарын бодит хамтын ажиллагааг эрчимжүүлэхэд чухал ач холбогдолтой болсон юм.

2023 оны долдугаар сар. Монгол Улсын Ерөнхий сайд Л.Оюун-Эрдэнэ АНУ-ын Дэд Ерөнхийлөгч эрхэмсэг хатагтай Камала Харрисын урилгаар тус улсад албан ёсны айлчлал хийв. Уг айлчлалаар Монгол Улс “Гуравдагч хөршийн бодлого”-оо өргөжүүлснээ зарласан агаад гадаад харилцааны тэнцвэрийг хадгалахад энэ бодлого нэн чухал болохыг тодотгож байлаа.

Хамгийн чухал нь “гуравдагч хөршийн стратегийн түншлэл”-ийг баталгаажуулж авсан нь үндэсний аюулгүй байдал, эдийн засгийн ач холбогдол таласаа хамгийн гол онцлох үйл явдал байв. Өөрөөр хэлбэл, Монгол Улсын эдийн засгийг төрөлжүүлэх хүрээнд хоёр улс “Стратегийн гуравдагч хөршийн эдийн засгийн замын зураглал”-ыг шинэчлэн байгуулж байгаа нь худалдаа, эдийн засгийн хамтын ажиллагаа, АНУ-ын хөрөнгө оруулалтыг нэмэгдүүлэхэд чухал үүрэг гүйцэтгэнэ гэж тодотгож байв.

Нэгэн үетэй харьцуулахад 2021-2023 он гадаад харилцааны хувьд шинээр сэргэсэн он жилүүд байлаа.

Б.БАТ

Эх сурвалж: news.mn

Санал болгох мэдээ

“Сөүл” рестораны эзэмшлийн газраа хэтрүүлэн хашаалсан зөрчлийг арилгуулна

Нийслэлийн Засаг дарга бөгөөд Улаанбаатар хотын Захирагч Х.Нямбаатар өнгөрсөн баасан гарагт хүүхдийн паркт ажиллаж, “Паркаа …