Өглөө.мн Шинэ өглөө, Шинэ мэдээлэл
Улаанбаатар хотод урд шөнө цасан болон бороо холилдон орж, зуны улирлын эхний сануулгыг өглөө. Энэ удаад хур тунадас харьцангуй бага байсан тул үер усны ноцтой нөхцөл үүссэнгүй. Гэвч тайвшрахад эрт байна. Усархаг борооны улирал айсуй. Сүүлийн жилүүдэд нийслэл хот зун бүр шахам үерт автаж, зам талбай усанд автсан, орон сууцны хонгил, гараашууд дүүрсэн, иргэд эд хөрөнгө, цаашлаад амь насаараа хохирсон харамсалтай тохиолдлууд давтагдсаар ирсэн.
Тэгвэл энэ жил бид үнэхээр бэлэн үү? Эсвэл байгалийн үзэгдлийг шалтаг болгон өмнөх алдаагаа дахин давтах уу?
Үерийн аман дээрх айл өрхүүдийг нүүлгэн шилжүүлж чадсан уу?
Жил бүрийн үерийн үеэр хамгийн их эрсдэлд өртдөг хүмүүс бол голын ай сав, үерийн ам, усны урсацын замд зөвшөөрөлгүйгээр буусан айл өрхүүд байдаг. Ус буух бүрд Онцгой байдлын алба хаагчид иргэдийг аврах ажиллагаанд дайчлагдаж, улмаар төрөөс их хэмжээний хөрөнгө зарцуулдаг.
Гэтэл асуудал үүссэний дараа бус, үүсэхээс нь өмнө арга хэмжээ авах ёстой. Нийслэлийн Засаг даргын Тамгын газар, Онцгой байдлын байгууллагууд үерийн эрсдэлтэй бүсэд байгаа айл өрхүүдийн судалгааг бүрэн гаргаж, нүүлгэн шилжүүлэх ажлаа ямар түвшинд хүргэв? Иргэдийн амь нас, эд хөрөнгийг хамгаалах хамгийн үр дүнтэй арга бол үер буусны дараа нөхөн сэргээх биш, эрсдэлтэй бүсээс нь урьдчилан гаргах явдал юм.
Багахан бороо ороход л зам яагаад нуур болдог вэ?
Улаанбаатарт хүчтэй аадар бороо орохыг хүлээх ч шаардлагагүй. Хэдхэн минутын борооны дараа зарим зам, уулзварууд усанд автдаг дүр зураг бидэнд хэдийнэ танил болсон.
Замын хажуугийн ус зайлуулах хоолой, шүүр, сувгууд хог, лаг шаварт бөглөрч, борооны ус урсах боломжгүй болсноос ус зам дээр тогтож, хөдөлгөөн саардаг. Явган хүний гарц усанд автдаг, автомашинууд ус цацан иргэдийг хүндрүүлдэг байдал ч үүнтэй холбоотой.
Нийслэлийн Авто замын хөгжлийн газар болон авто замын арчлалт, цэвэрлэгээ хариуцсан байгууллагууд ус тогтдог цэгүүдийнхээ судалгааг шинэчилж, ус зайлуулах байгууламжуудаа бүрэн цэвэрлэсэн үү? Эсвэл бороо орсны дараа л асуудал ярьж эхлэх үү?
Подвал, гараашийн үерт хэн хариуцлага хүлээх вэ?
Бороо орох бүрд орон сууцны хонгил, подвал, авто гараашууд усаар дүүрч, иргэдийн автомашин, эд хөрөнгө их хэмжээний хохирол амсдаг. Харин асуудал гарсны дараа СӨХ, ашиглалтын байгууллага, төрийн байгууллагуудын хооронд хариуцлагаас бултах маргаан эхэлдэг.
Гэтэл эрсдэлийг бууруулах хамгийн анхан шатны ажил болох ус зайлуулах насос, хаалт, хамгаалалтын системийн бэлэн байдлыг хангах нь тухайн байрны удирдлага, ашиглалтын байгууллагын шууд үүрэг юм.
СӨХ-үүд хариуцсан байрныхаа хонгил, техникийн өрөө, ус зайлуулах байгууламжийн бэлэн байдлыг шалгасан уу? Үерийн ус орохоос сэргийлэх төлөвлөгөөтэй юу? Иргэд хохирсны дараа буруутан хайхаас илүүтэй хариуцлагын эзнийг урьдчилан тодорхой болгох шаардлагатай байна.
Үерээс ч аюултай эрсдэл — Цахилгаан
Үер усны дараах хамгийн том аюул бол цахилгааны эрсдэл. Ус тогтсон хэсэгт ил задгай кабель, гэмтэлтэй утас, хамгаалалтгүй цахилгааны шон байвал тэр хэсэг бүхэлдээ амь насанд аюултай бүс болж хувирдаг.
Өмнөх жилүүдэд үерийн усанд тог дамжиж, иргэд, хүүхэд залуус эрүүл мэнд, амь насаараа хохирсон харамсалтай тохиолдлууд гарч байсан. Энэ бол зөвхөн эд хөрөнгийн биш, хүний амь насны асуудал юм.
Тиймээс эрчим хүч түгээх байгууллагууд, цахилгаан шугам сүлжээний компаниуд хотын хэмжээнд ил задгай утас, хамгаалалтгүй кабель, эвдрэлтэй тоног төхөөрөмжүүдийн үзлэг шалгалтыг хийж, шаардлагатай арга хэмжээг яаралтай авах шаардлагатай байна
Үер ус бол байгалийн үзэгдэл. Харин жил бүр ижил шалтгаанаар ижил хохирол амсах нь байгалийн биш, хүний буруу төлөвлөлт, бэлтгэлгүй байдал, хариуцлагагүй байдлын үр дагавар юм.
Бороо орохоос өмнө эрсдэлтэй бүсийн айлуудаа нүүлгэсэн үү? Ус зайлуулах хоолойгоо цэвэрлэсэн үү? Подвал, гараашийн хамгаалалтаа шалгасан уу? Цахилгааны аюулгүй байдлаа хангаж чадсан уу?
Х.Э
