Д.Сугар энэ удаа сугарч үлдэхгүй нь

ТӨХ-ны дарга асан, Үндсэн хуулийн Цэцийн ги­шүүн Д.Сугарыг УМБГ-ын Эдийн засгийн гэмт хэрэг мөрдөх хэлтсээс дахин шалгаж эхэллээ.

Түүнийг  МИАТ-ийн хэ­­­­­­­­рэгт холбогдуулж шалгаж эхэлсэн байна. Өмнө нь түүнийг шалгах гэхэд Үндсэн хуулийн Цэ­цийн гишүүний бүрэн эрх нь саад болж хэргийг түд­гэл­зүүлээд байсан юм. Түүний бүрэн эрхийг түд­гэлзүүлэх хүсэлтийг Ерөн­­­­­хий проку­ророос хоёр ч удаа Үндсэн хуулийн Цэцэд тавьж байсан боловч хүлээж аваа­гүй билээ. Уг нь мөрдөн бай­цаагчид өөрсдийн зүгээс шаард­лагатай  бүх л үйл ажиллагааг явуулж,  Д.Су­гараас мэдүүлэг авах, шин­­жээчийн дүгнэлт гаргах зэ­рэг ажиллагаа л  үлд­сэн юм.

Харин энэ удаад түүнтэй холбоотой  хэргийг сэргээж дахин шалгахаар болж. Яах аргагүй баримт, нотолгоотой гэмт хэргийнх нь ул мөр ч илэрсэн учраас түүнтэй холбогдох хэрэг олон са­раар саатаад байсан гэсэн үг. Харин одоо  шалгах үндэс­лэл нь түүнийг ТӨХ-ны дарга байхдаа МИАТ-ийн удирдлагуудтай хамт­ран мөнгө угаасан байж бол­зошгүй гэх үндэслэл аж.

Ямартай ч Д.Сугар эл хэр­гээс сугарч үлдэхгүй нь тодорхой боллоо гэж зарим албаны хүмүүс хэлж байна.

Хэдийгээр өнөөдөр “МИАТ”-ийн экс удирд­лагууд болон “Дайны эрсд­лийн сан”-гийн мөнгийг хулгайлан завшсан хэрэгт холбоотой хүмүүс эдлэх ёстой  ялаа авч, зарим нэг нь  эдлэх учиртай ялаа ихээ­хэн хөнгөрүүлж чадсан нь ч энэ хууль бус шүүхийн үйл ажиллагаа хэзээ нэгэн цагт илэрч, ард түмний шу­дарга шүүхийн өмнө зог­сох нь тодорхой.

Тэгээд ч олон нийт тэднийг мөнгө угаа­сан хэрэгт холбогдуулан шал­гаагүй юм бол ингэж сүр дуулиан тарих хэрэг байсан юм уу гэж ч өөрсдийн санал бодлоо илэрхийлсээр байгаа.

Гэхдээ улсад  30 тэрбум төгрөгийн хохирол учруулсан гол гэмт  хэрэгтэн Д.Сугар өнөөдөр ямар ч ял зэмгүй малилзаад алхаж яваа нь шударга ёс мөн үү гэж асуух хүн ч олон байна.

Тухайн үед ТӨХ-оог толгойлж бай­сан энэ нө­хөр  хамгийн их орол­цоо­той, улсын өмчийг шам­шиг­дуул­сан нөхдөд боломж олго­сон  нь ч  үнэний ор­той. Товчхондоо “Тул зага­сыг нь бариагүй хэрнээ жи­жиг жараахайнуудад ял үү­рүүл­чихсэн”. Ер нь бол Д.Сугар ТӨХ-ны даргаар ажиллаж байх хугацаандаа маш олон өмч хувьчлалыг гувчуулж хувьдаа асар их хэмжээний ашиг олсон нь баримтаар дэлгэгдэж байсан. Сэлэнгэ аймгийн гурилын үйлдвэр, ер нь Сэлэнгэ айм­гийг дампууруулсан эт­гээд гээд хэлчихэд нэг их буруудахгүй. Тэрбээр ТӨХ-ны даргаар ажиллаж байх­даа МИАТ-ийн Япон дахь зөвлөхөөр томилогдож, ца­лин авч байсан баримт бай­даг.

Улмаар Япон, БНСУ-ын баячуудын амьдардаг хо­роололд хувийн орон сууц худалдан авсан, гэрээ хийж түлхүүрээ гардаж буй зураг нь нотлох баримт болж хэсэгтээ л шуугиулсан.

 Уг орон сууцыг худалдан авах мөнгийг МИАТ-ийн экс удирдлага “угаасан” мөнгөнөөсөө шилжүүлж байсан байж болзошгүй гэж хууль хяналтын бай­гуул­лагынхан үзэж байгаа юм. Мөн Улсын цирк, “Говь” ком­панийн хувьчлал, “Монгол­росцветмет”-ийн мэдэлд бай­сан Баян-Өлгий аймаг дахь “Асгат”-ын мөнгөний орд гээд хууль бус хувьчлал бү­хэнд Д.Сугарын нэр хол­боотой. Харин хамгийн сүүлд гарсан дуулиан нь ол­ны анхаарлын төвд байгаа  “Хадгаламж” банкны хувьчлал, “Жаст” группийн удирдлагатай холбоотой  асуу­дал юм. Энэ хүн Монгол Ул­сын хууль цаазаас илүү эрх эдэлдэг нь ямар учир­тай вэ. Яагаад сар бүр ца­лин­гаасаа суутгал төлж, ирээ­дүйн амьдралаа чадан ядан баталгаажуулж хоёр идэ­хгүй хоосон хонохгүй амьдарч байгаа биднээс тол­гой өндөр эрх ямба эдлэх ёстой вэ.

Ямартай ч түүний холбогдсон олон хууль бус үйлдэлүүдийн нэгээхэн хэсэг нь дээрх явдлууд. Гэхдээ тэр одоо шалгагдах боллоо. Хамгийн гол нь дахин сугарч үлдэх үү л гэдгийг л харах үлдэж байна. Хэрвээ бид алдаж оносон ч ардчиллын замаар 23 жил замнаж яваа нь үнэн л юм бол Д.Сугар шударга шүүхийн гадна үлдэх ёсгүй.

Р.Саруул