Өглөө.мн Шинэ өглөө, Шинэ мэдээлэл
Буудлага спортын 2014 оны өсвөр үеийн Улсын аварга шалгаруулах тэмцээн /УАШТ/ нэгдүгээр сарын 13-15-ны өдрүүдэд Батлан хамгаалахад туслах нийгэмлэгийн Техник спортын төвд болох ажээ. Зургаа дахь удаагийн энэхүү тэмцээнд 1996 оны нэгдүгээр сарын 01-нээс хойш төрсөн охид, хөвгүүд өрсөлдөх аж. Улсын аваргаас шалгарсан тамирчид ирэх гуравдугаар сарын 7-нд Кувейтэд болох Ази тивийн аварга шалгаруулах тэмцээнд оролцож, Залуучуудын олимпийн эрхийн төлөө өрсөлдөнө.
Сонирхуулахад, Өсвөр үеийн тэмцээн нь зөвхөн хийн бууны дасгалд бууддаг бөгөөд буудлагад өсвөр үе, насанд хүрэгчид гэж буудах дасгал, зай, хугацаа, цол зэрэг, буу сум зэрэгт ялгаа байдаггүй адилхан байдаг юм.
ХВ-4 дасгал гэдэг нь хийн винтовоор 10 метрийн зайд 50 минутад зогсоогоос 40 сум буудах эмэгтэйчүүдийн дасгалыг хэлдэг бол ХВ-6 дасгал гэдэг нь хийн винтовоор 10 метрийн зайд 75 минутад зогсоогоос 60 сум буудах эрэгтэйчүүдийн дасгал / Хийн урт буу гэдэг/ юм. Харин ХГ-4 дасгал гэдэг нь хийн гар буугаар 10 метрийн зайд 50 минутанд зогсоогоос 40 сум буудах эмэгтэйчүүдийн, ХГ-6 дасгал нь хийн гар буугаар 10 метрийн зайд 75 минутанд зогсоогоос 60 сум буудах эрэгтэйчүүдийн дасгал болно.
