Эзэгтэй нарт өгөх ахуйн зөвлөгөө

– Нэхий дээлэнд товч хадахдаа үсийг нь орооцолдуулахгүйн тудд нимгэн цаас тавьж оёод, эцэст нь салгаарай.

– Дэрний өд уутаа нэвтэлж гарахыг болиулах гэвэл уутыг нь савантай усанд дэвтээж, хатсаных нь дараа индүүд.

– Саванг чийгтэй газар хадгалсанаас хуурай газарт хадгалбал гурав дахин удаан хэрэглэх боломжтой.

– Бяслаг юмуу сонгино хийж байсан хуванцар савыг хүнсний содтой усаар зайлбал өвөрмөц үнэр нь арилна.

– Хаг тогтсон саванд төмсний хальс хийж буцалгавал амархан цэвэршдэг.

– Үйсэн бөглөө шилний аманд томдоод таарахгүй байвал буцалж байгаа усанд хэдэн минут байлгаад үз.

– Шилэн бөглөө нь зуурчихаад онгойхгүй байгаа лонхонд ургамлын тос дусааж халуун газар ээх хэрэгтэй.

– Хаалганы нугас хяхтанахад балын харандааны өөдөс хавчуулбал дуугарахаа болино.

– Нүдний шилийг цантуулахгүй байя гэвэл өглөө савантай алчуураар арчиж, зөөлөн үстэй даавуугаар зүлгэ.

– Зуушны тавгийг сармисаар арчвал зууш, хоол чинь сайхан үнэртэй болно. Хуучин ногоог цуутай хүйтэн усанд цаг хиртэй байлгавал шинэ юм шиг болно. Хатаасан мөөгийг давстай сүүнд дэвтээвэл дахин зөөлөрдөг аж.

– Дарсны толбыг бүлээн сүүнд сайн угаасны дараа эхлээд хүйтэн дараа нь халуун усанд булхаж арилгадаг.

– Хувцсан дээрээ хар бэх асгачихвал халуун сүүнд дүрэхэд түргэн арилдаг.

– Уруулын будагны толбыг спиртээр арчаарай.

– Ногооны мохсон үрүүрийг төмрийн зүлгүүрээр үрвэл дахин ир ордог.

– Шарлаж, өнгөө алдсан хөшиг юмуу нусны алчуурыг давстай усанд дэвтээж байгаад угаа.

– Сүүнд бага зэрэг давс хийвэл гашлах нь багасдаг.