“Голден парк” хотхоны 3000 гаруй оршин суугч хохирох ёстой юу

Төрийн албан хаагчдын буруу  шийдвэрээс болж өнөө­дөр маш олон оршин суугч хохироод байна.

Тодруулбал Баянгол дүүр­­гийн IV хо­рооны нутаг дэвсгэрт орших “Голден парк” хотхоны 3000 гаруй оршин суугч гу­дамжинд га­рах дээрээ тул­жээ. Учир нь “Материал  импекс” компани тус  хот­хоны  газрыг “Бидний га­зар” хэмээн хуулийн бай­гуул­лагаар явж сүүлийн ша­тандаа ялалт байгуулсан аж.

Тиймээс оршин суугчид айдас хүйдэс дагуулан бид хэзээ хөөгдөх бол гэж сууж байна. Тодруулбал өнгөрсөн нэгдүгээр сарын 6-ны өдөр Дээд шүүхийн хяналтын шатны захиргааны хэргийн шүүх  хуралдааныг   Тан­химын тэргүүн О.Зандраа даргалагч  шүүгчээр ажил­лаж, шүүгч Х.Батсүрэн, Ч.Тунгалаг, Ц.Сумьяа, Д.Мөнхтуяа на­рын бүрэл­дэхүүнтэйгээр  ху­рал­дан   шийд­­вэрээ “Материал Им­пекс”-ийн  талд гаргасанд ор­шин суугчид их л эгдүүцэж буйгаа илэрхийлсэн юм.

Уг нь өмнөх хоёр шатны шүүх болсон асуудлыг хууль журмын дагуу  “Эко конст­ракшн”  компани авах нь үндэслэлтэй хэмээн ший­дэж байжээ. Гэтэл одоо чу­хам яагаад өмнөх хоёр шатны шүүхийн шийдвэрээ эрс үгүйсгэж “Материал им­­­пекс”-ийн талд шийд­вэрийг гаргасан юм бол гэж үзэж буйгаа илэрхийлсэн юм. Оршин суугчид тухайн өдөр шүүхийн  танхимд ард түмнээ хүндэтгэсэн шүүх хурал бол­но гэж их л итгэж байсан.  Хэн нэгэн мөнгөтэй эрхмийн талд асуудлыг шийднэ гэж бодоогүй гэдгээ хэлж байсан юм.

Д.Бор: Газрын зөвшөөрөлтэй байсан болоод орон сууц барина биз дээ

Ингээд тус хотхоны оршин суугчдын төлөөл болох 302 дугаар байрны иргэн Д. Бор хэлэхдээ  “ Би өнөөдөр энэ хотхонд байр худалдаж авснаараа хохирох нь шиг байна.

Энэ 301, 302, 303 ду­гаар байрны оршин суугчид сүүлийн нэг сар орчмын хугацаанд маш хэцүү бай­далтай байна. Өнгөрсөн сарын 6-нд Дээд шүүхийн хяналтын шатны захиргааны хэргийн шүүх хуралдааныг даргалагч О.Занд­­раа гэдэг хүний бал­гаас болж  олон мянган ор­шин суугч хо­хироод байна.

Бид нэг л юмыг их гайхдаг. Учир нь тухайн үед  манай хот­­хоныг барьж байхад “Материал импекс” ком­пани “Эко конст­­ракшн”-ы барилгыг яагаад зогс­оогүй юм бэ. Асуудлын гол нь энэ л байгаа биз дээ.

Энгийн хүний нүдээр харахад мэдээж “Эко конст­рак­шн” газрын зөвшөө­рөлтэй, барилга барих зөв­­­­шөө­рөл болон бусад хол­бог­дох бичиг баримт нь хууль ёсны дагуу болоод л ба­рил­га ашиглалтад ор­сон байж таарна биз дээ.

Үнэ­хээр хүний газарт барил­га барьсан бол нөгөө айхтар Улсын комисс энэ хотхоныг хүлээж авах уу.

Сая бол шүүх шийдвэрээ ерөөсөө л “Материал  им­пекс”-ийн  захирлын талд  гаргасан шүү дээ. Ер нь бол айлын хашаанд зөвшөөрөлгүй орж барилга барих хүн байх уу. Хоёр компанийн захирал хоорондоо ямар нэгэн гэрээ хэлцэл хийсний үндсэн дээр энэ олон барилгыг барьсан байж таарна шүү дээ.

Бид энэ талаар олж сонсох нь ээ хоёр тал хоорондоо тохиролцоо хийсэн юм билээ. Одоо түүн дээрээ тохирохгүй болохоороо “Материал импекс” ийм муухай хударгагүй зан гар­гаж байгаа гэсэн. Энд чинь нэг компанийн эрх ашиг яригдахгүй 700 гаруй өрхийн 3000 оршин суугчийн эрх ашиг эхний асуудал болж хөндөгдөх ёстой. Гэтэл шүүх хэн нэгэн мөнгөтэй эрх­­­мийн талд үйлчилж хоёр шатны шүүхийн шийд­вэ­рийг илтэд үгүйсгэж “Ма­териал импекс”-ийн талд шийдвэрийг гаргаж болох­гүй л баймаар юм.

Шүүхийн ийм балиар шийдвэрээс болж зарим нэг оршин суугч өнөөг хүртэл байрны  ордероо гаргаж авч чадаагүй байгаа. Энд чинь өр зээлтэй маш олон хүн байгаа шүү дээ.

Уг нь бид орон сууцандаа ороод хоёр жил гаруй болж байна. Яагаад өмнө нь энэ асуудлыг ярьж байгаагүй юм бэ гэдэг сонин. За ер нь шүүхийн шийдвэр “Материал импекс”-ийн талд гарлаа. Одоо тэд тэгээд яах вэ. Энэ их өртгөөр боссон орон сууцуудыг нураах юм уу.  Оршин суугчид бүгд л миний ярьсныг  хэлэх байх. Тиймээс төр, засаг энэ асуудлыг яаралтай ший­дэх­гүй бол олон мянган иргэн гудамжинд гарах дээрээ ту­лаад байна шүү гэдгийг дамжуулмаар байна” гэлээ.

Биднийг ийнхүү оршин суугчидтай уулзаад явж байхад маш олон иргэн Улсын Дээд шүүхийн шийдвэрийг эсэргүүцэж буйгаа хэлэхийг хүссэн юм.

Г.Цэцэг: Хоёр компанийн захирал  тохиролцож чадаагүй юм байлгүй

Тус хотхоны 301 дүгээр байрны оршин суугч Г.Цэцэг “Үнэхээр энэ газар “Материал импекс” компанийнх байсан юм бол анхнаасаа барилга бариулахгүй байх боломж байсан шүү дээ.   Тухайн он жилүүдэд өөрсдөө харилцан тохиролцож барилга барьчи­­хаад одоо иймэрхүү асуу­дал гаргасан нь сонин байна.

Хамгийн гол нь 700 өр­хийн 3000 гаруй оршин суугчийн эрх ашиг энд хөн­дөгдөнө гэдгийг яагаад “Материал импекс” компани бодолцоогүй юм бэ.

Ашиглалтад орохоос өмнө газрын асуудлаа шийдэх цаг хугацаа болон боломж байсан  гэж бодож байна. Тэд хоорондоо тохиролцсоны үндсэн дээр энэ хотхон баригдсан болж таарна.

Хэр­вээ зөвшөөрөлгүй ба­рилга барихаао бол газар ухаад ирэнгүүт л асуудал үүсэх ёстой биз дээ. Тухайн үед одооных шиг асуудал үүсгэж зарга хийгээгүй мөртлөө олон айл өрх орсон хойно нь биднийг ингэж хохироож болохгүй баймаар санагдах юм. Саяны шүүхийн шийдвэр гарснаас хойш бид айдастай амьдрах болоод байна. Тэд өөрсдийн танил талаа харж шүүхэд нөлөөлсөн гэж үзэж байгаа.

Тэгээгүй юм бол яагаад өмнөх хоёр шатны шүүх “Эко констракшн” компанийн талд гаргаж байсан юм бэ.

Бид “Эко”-г хууль ёсны зөвшөөрлийн дагуу барилга барьсан гэж бодож байгаа. Энэ олон жилийн хугацаанд чимээгүй байчихаад одоо ингэж байгаа нь сонин шүү дээ. Одоо газрыг чөлөөлүүлнэ гээд оршин суугч  биднийг хүчээр гудамжинд хөөж гаргах гээд байгаа юм уу.

Өчнөөн олон сая төгрөгөөр дундаж амьдралтай бид зовлогоо зовоож авчихаад хэн нэгэн мөнгөтэй эрхмийн балгаас болж орон байраа алдана гэж байхгүй.

Тэгээд ч энэ хотхон “Эко констракшн” компанид ямар ч хамаагүй байх. Тэд ба­рилгаа бариад оршин суугч бидэнд  худалдаад явсан хү­мүүс. Тиймээс тус компани биднийг хамгаалах биш. Бид  өөрсдийгөө хамгаалах ёстой гэж бодож байна.

Цаашид байдал яах эсэх нь тодорхойгүй хүнд байна. Иргэд  бид  тэмцээд  ч мөнгөтэй компа­нийг дий­­­­­лэх­гүй байна. Ерөн­хийлөгч Ц.Элбэгдоржид захи­дал ил­­гээ­сэн.  Тиймээс Ерөн­хий­лөгч энэ бүхнийг анхаарч ир­гэдээ дэм­жинэ гэдэгт итгэл­тэй байна” гэв.

Ямартай ч бидэнтэй уулзсан олон оршин суугч  хамаг хашаа хороо, эд хө­рөн­гөө зарж, банкны өн­дөр болон бага хүүтэй зээ­лд хамрагдах гэж удаан хөөцөлдсөний эцэст орон сууцтай боллоо гэж баярлаж байсан. Гэтэл шүүх ард түмний талд биш зөвхөн эрх мэдэл,  хөрөнгө мөнгө харж олон мянган иргэнийг шу­дарга шүүхийн өмнө ийнхүү бөхийлгөж байна гэж хэлж байсан юм.

Тиймээс бид сүүлийн ша­танд заргаа авсан гэх “Мате­риал импекс”-ийг зорьж хол­богдох албаны хү­мүү­­сээс нь үүссэн нөхцөл байд­лын талаар тодруулсан юм.

Г.Аюушмаа: Оршин суугчдийг гудамжинд хөөж гаргах асуудал огт яригдаагүй

Ингээд тус компанийн Захиргааны хэлтсийн дарга Г.Аюушмаатай уулзахад “Анх бид газрын асуудлаар маргаан үүсгээгүй. “Эко констракшн” компанийн за­хи­­рал  О.Нямдаваа бидэнд хам­тарч ажиллах санал тавьж байсан. Бид түүний хүсэл­тийг хүлээж аваад 2007 онд хамтарч ажиллах гэрээгээ байгуулсан юм. Ма­най компани  орон сууцны хо­роолол барих зөвшөөрлөө авчихсан байсан нь хамтарч ажиллах үндсэн шалтгаан болсон.

Яг энэ үед барилгын зураг гарчихсан, газар ол­голт нь хийгдсэн газрын төл­бөр болон бусад бичиг ба­римтаа хууль ёсны да­гуу л бүрдүүлсэн байсан. Гэтэл О.Нямдаваа “Би энэ ба­рил­­гыг чинь барихад хө­рөн­­гө оруулалт хийе. Би ба­рилгын том  компанийн мэр­гэжлийн хүн. Танайх газ­­раа чөлөөлж өг гэсэн юм.

Бид арван зургаан дав­хар дөчин барилга барих гэж байсан.  Товчхондоо манай эзэмшил газар дээр л энэ барилгыг барихад өөрийнхөө ажилчдын хө­рөн­гө оруулалтаар хийх ёс­той байсан юм.

Хэрвээ тэд барил­гыг хууль журмынх нь дагуу барьсан бол бидний хооронд ашиг хуваах асуудал яриг­дах ёстой байсан. Бид хам­тарч ажиллаж байгаа учраас эхний ээлжинд газраа чөлөөлж өгсөн. Ингээд 2007 оны сүүлчээр газар шорооныхоо ажлаасаа эхэлсэн. Гэтэл гэнэт  2008 онд О.Нямдаваа танай газрыг өөрийнхөө нэр дээр шилжүүлж авсан байна гэх мэдээлэл бидэнд ирэхэд эхэндээ итгээгүй л дээ.

Тэгээд үнэн худлыг нь шалгахаар Нийслэлийн газрын албан дээр очиж асуухад “Тийм зүйл байх­гүй ээ” гэж хэлсэн боловч О.Нямдаваад 2008 оны дөрөвдүгээр сарын 17-ны өдрийн 188, 877 тоот захирамжуудаар  түүний нэр дээр шилжүүлсэн байсан. Үүнийг би бүтэн гурван жил хөөцөлдсөний эцэст буюу 2011 оны тавдугаар сарын 11-нд захирамжийг нь олж авсан. Биднээс энэ захи­рамжийг нууж маш их цаг хугацаа алдуулсан. Энэ хооронд  нөгөө эхлүүлсэн барилга чинь баригдаад байгаа шүү дээ.

Үүнээс 101-107 гэсэн долоон барилга баригдаж байгаа. Бид аргаа бараад “За яах вэ барилга нэгэнт ба­ригдчихлаа. Одоо бариг­даагүй үлдсэн гурван барил­­гын газраа буцааж авъя гэхэд” тэд боломжгүй гэх хариултыг өгсөн.  Товчхондоо Нийс­лэ­лийн газрын алба бидэнд мэ­дэг­­дэхгүйгээр  захирамж гаргасан гэсэн үг.

Энэ хооронд бүх газрын төлбөр тооцоо болон хууль ёсны бичиг баримт бидний нэр дээр яваад байгаа шүү дээ.  Тиймээс л анх О.Нямдаваад гаргасан  газ­рын захирамжийг олж аваад анхан шатны шүүхэд хандсан.  Хандахдаа “Хууль бусаар газар шилжүүлсэн асуудлыг шалгаж өгнө үү” гэж хүссэн.

Гэтэл анхан шатны  шүүх авч хэлэлцээд  “Эко констракшн” компа­нийн барилгын ажлыг түд­­­гэл­­­­­­зүүлсэн. Гэтэл тус ком­пани шүүхээс гаргасан шийд­­вэрийг хэрэгжүү­лэл­гүй­гээр барилгаа барьсаар Захир­гааны хэргийн шүү­хийн шийд­вэртэй золгосон.

Тус шүүхээс  дээрх хоёр захирамжийг хүчингүй бол­госон шийдвэр гаргасан.

Хэрвээ энэ бүх шүүхийн шийдвэрийг “Эко” компани хэрэгжүүлсэн бол өнөөдөр асуудал ийм дээрээ тулахгүй байсан. Тэдний энэ шоронгийн байрнаас до­лоон дор барилгыг хүлээж авсан Улсын комисс болон мэргэжлийн хяналтынхан маш их буруутай.

Товч­хондоо тус компани барилга эхлүүлэх зөвшөөрөл болон газрын зөвшөөрөлгүй байс­ныг нь МХЕГ мэдсэн хэрнээ бариулсанд тус газрыг бас шүүхэд өгсөн. Мөн бид Хүний эрхийн үндэсний комисст гомдол гаргахдаа” Хүн амьдрах орчин байхгүй. Хорих ангийн барилгаас долоон дор барилгыг Улсын комисс буюу МХЕГ хүлээж авлаа” гэж гаргасан.

Уг нь энэ орон сууц  “Материал импекс” гэсэн хороолол бий болох ёстой байтал “Голден парк” бол­гож бүхий л зүйлийг нь өөрчилж өөрсдийн хувийн мэт болгосон. Энэ барилгуудыг нэгэнт хууль зөрчигдөөд баригдсан гэдгийг мэдсээр байж зогсоохгүй бариулсан төрийн албан хаагчдийг л буруутгаж байгаа юм.

Ер нь шүүхийн шийдвэр гарчихаад байхад биелүүлэх төрийн байгууллага нь алга байна. Тиймээс бид Баян­гол дүүргийн цагдаад хан­даж барилга хүлээж авсан Улсын комиссынхонд  Эрүүгийн хуулийн 258.1 гэдэг зүйл ангиар эрүүгийн хэрэг үүсгүүлсэн. Уг нь энэ анх иргэний хэрэг байсан. Гэтэл одоо эрүүгийн хэрэг болчихоод байна шүү дээ. Нэг ёсондоо эл хотхон нь хүний эрүүл аюулгүй амьдрах орчныг зөрчсөн барилгууд гэж мөн холбогдох газруудад нь хандсан.

Монголын нийт ард түмэн 1954 оноос өнөөг хүртэл энэ газар манай эзэмшлийн нэр дээр байсан гэдгийг мэдэх байх. “Эко” бидний бүх нэр усыг өөрчилж гэрээгээ зөрчсөн. Эрүү үүсгэсэн хэргийг шүүх зөв шийдсэн. Түүнээс энд манайхаас ямар ч  нөлөөлөл ороогүй гэдгийг баттай хэлэх байна. Бүх зүйл шударгаар явагд­сан. Хэрэв та нар шаардлагатай гэвэл энэ олон бичиг баримттай танилцаж болно.

Бид өнөөдөр шүүхэд ялснаараа тэр олон оршин суугчийг хөөж гаргана гэж байхгүй. Энд зөвхөн буруу шийдвэр гаргасан төрийн албан хаагчдыг яах вэ гэдэг асуудал яригдаж байгаа болохоос биш.

Ор­шин суугчдийг гудам­жинд хөөж гаргах асуудал огт яригдаагүй. Эцэст нь хэлэхэд “Эко констаркшн” компа­нийн захирал О.Ням­даваатай үгсэн хуйвалдаж хууль бусаар газар олголт хийсэн газ­рын албаны тухайн үеийн дарга асан  Ц.Сандуйг шалгах нь зүйтэй гэж үзэж байгаа. Энэ нөхөр л бүх хуйвалдааныг хийсний үндсэн дээр асуудал өдгөө ийм байдалд хүрчихээд бай­на” гэлээ. Үүний дараа бид Дээд шүүхийн хяналтын шатны захиргааны хэргийн шүүхийн шүүгч О.Зандраатай уулзах гэсэн боловч “Хууль ёсны дагуу асуудлыг шийдсэн. Хэн нэгэн мөнгөтэй эрхмийн талд үйлчилсэн зүйл байх­гүй” гээд дараагийн шүүх хуралдаа орохоор явсан юм.

Ямартай ч бид өнөөдөр эрх ашиг нь зөрчигдсөн 3000 гаруй оршин суугчийн санаа бодлыг олон нийтэд үнэн зөвөөр хүргэхийг зорьсон юм. Харин “Материал им­пекс” компанийн зүгээс ор­шин суугчдийг гудамжинд хөөж гаргах асуудал  огт яригдаагүй. Зөвхөн хууль ёсны зөвшөөрөлгүй барилгыг хүлээж авсан МХЕГ болон Улсын комиссынхныг шал­­­­­гуулах тухай асуудал яригдсан гэдгийг хэлж бай­сан.

Тэгэхээр төрийн албыг залгуулж буй хариуцлагагүй нөхдийн өмнөөс банканд өртэй 3000 гаруй оршин суугч хохирох ёсгүй гэдгийг хэлэх нь зүйн хэрэг байх. Бид дараагийн дугаартаа болсон үйл явдлыг үргэлжлүүлэн хүргэх болно.

Үргэлжлэл бий…