Г.Мандахнаран дэлхийн чансаад 3-рт бичигджээ

Энэ чансаанд АНУ-ын Д.Шульцийн нэрэмжит, Болгарын Дан-Коловын, Кубын Гранма Цом, Ираны Тахтийн цом, ОХУ-ын И.Ярыгиний нэрэмжит “Алтан Гран-При”, Туркийн Яшар Догугийн нэрэмжит, Францын “Алтан Гран-При”, Шведийн “Клиппан хатагтай”, “Mongolia Open-2014” зэрэг олон улсын тэмцээнд өндөр амжилт гаргаж медаль авсан бөхчүүдийн чансаа дээшилсэн байна. Манай бөхчүүд гадаадад Францын “Алтан Гран-При” тэмцээнээс 3 алт, Болгарын Дан Коловын болон Яшар Догугийн тэмцээнээс тус бүр нэг алтан медаль хүртэж эх орондоо болсон “Mongolia Open-2014” тэмцээнээс 36 нийт медаль, түүний дотор 9 алтан медаль авсан нь нөлөөлж зарим бөхчүүдийн чансаа нилээд өссөн байна.

Эмэгтэй бөхчүүдээс 8 бөх жин бүрийнхээ эхний хорьд багтсанаас 53 кг-ын жинд олон улсын хэмжээний мастер Э.Сумьяа, 63 кг-ын жинд Гавьяат тамирчин С.Батцэцэг, 75 кг-ын жинд Гавьяат тамирчин О.Бурмаа нар хоёрдугаарт, 53 кг-ын жинд олон улсын хэмжээний мастер А.Батцэцэг 13 дугаарт, 58 кг-ын жинд олон улсын хэмжээний мастер С.Цэрэнчимэд гуравдугаарт, 60 кг-ын жинд олон улсын хэмжээний мастер Т.Мөнхтуяа, 69 кг-ын жинд Гавьяат тамирчин О.Насанбурмаа тавдугаарт, 69 кг-ын жинд олон улсын хэмжээний мастер Б.Одончимэг 19 дүгээрт бичигджээ.

Эрэгтэй бөхчүүдээс эхний хорьд 5 бөх байгаагаас 57 кг-ын жинд олон улсын хэмжээний мастер Б.Номин долоодугаарт, олон улсын хэмжээний мастер Д.Цогтбаатар 14 дүгээрт, 61 кг-ын жинд олон улсын хэмжээний мастер Э.Ням-Очир тавдугаарт, 65 кг-ын жинд  Гавьяат тамирчин Г.Мандахнаран гуравдугаарт, 97 кг-ын жинд олон улсын Д.Хүдэрбулга 15 дугаар бичигдсэн байна. МЧБХ