Өглөө.мн Шинэ өглөө, Шинэ мэдээлэл
Нийслэлийн Засаг дарга бөгөөд Улаанбаатар хотын захирагч Э.Бат-Үүл Танаа
2015 оны нэгдүгээр сарын 20
Таны энэ өдрийн амар амгаланг эрье. Юуны өмнө Монгол Улсын Боловсролын салбарт олон жил ажиллаж буй жирийн нэг багшид Нийслэлийн Засаг дарга бөгөөд Улаанбаатар хотын захирагчид хандан цахим ертөнцөөр дамжуулан мэдээлэл хүргэж, захидал илгээхээс өөр сонголт үлдээгүйг болгооно уу. Миний бие 2014 оны хавраас хойш Боловсролын салбарт өрнөж буй дажин, түүнийг тойрсон бодит мэдээллийг Нийслэлийн Засаг дарга Танд хүргэхээр Улаанбаатар хотын захиргааны босгыг хэд хэдэн удаа элээсэн болно. Мөн цөөнгүй санал, гомдол хүргүүлсэн ч “Хотын захирагч ажил ихтэй” гэх эрх бүхий албан тушаалтнуудын үгэнд “хашигдан” уулзах боломж олдоогүйг дурдая.
Ингээд гол асуудлаа хөндөе. 2013-2014 оны хичээлийн жил эхлэхтэй зэрэгцэн Нийслэлийн боловсролын газар нь Улаанбаатар хотын ЕБС, цэцэрлэгийн захирал, эрхлэгч, сургалтын менежер, арга зүйчийг сонгон шалгаруулалтаар ажилд авах журам боловсруулж хэрэгжүүлсэн. Эх орны үе үеийн ирээдүйг бэлтгэдэг багш сурган хүмүүжүүлэгчид бид энэхүү ажлыг нүдээ олсон шийдэл, боловсролын салбарын чадварлаг боловсон хүчнийг дэмжих том өөрчлөлт хэмээн хүлээн авч байлаа. Гэвч шинэ журам нь оновчтой өөрчлөлт, зохион байгуулалт биш Боловсролын салбарын үүр, үндэсийг эвдэх, тогтсон чанар чансааг сульдаах завхрал гэдгийг энэ салбарт олон жил ажилласан багш, сурган хүмүүжүүлэгчид бид олж харж, сөрөг үр дагавар, хор хохирлыг бие сэтгэлээрээ амсаж явна. Үүний улмаас Боловсролын байгууллагад энэ салбарт 15-25 жил зүрх сэтгэлээ зориулсан ЕСБ-ийн олон захирал, цэцэрлэгийн эрхлэгч, сурган хүмүүжүүлэгчид ямар ч шалтгаангүй гудамжинд гаргав. Тэд чадваргүйдээ биш, Нийслэлийн Боловсролын газрын дарга Ц.Отгонбаганын тайлбарласнаар АН-ыг дэмждэггүй гэх үндэслэлээр ажлын байраа өгч байгаа нь харамсал төрүүлж байна.
Нийслэлийн боловсролын газрын энэ өөрчлөлт нь хуулийн нэр барьж албан тушаал авах санаархал байж. Ажлаас халагдсан хүмүүсийн оронд томилогдсон захирал, эрхлэгчид өөрсдийн ах дүү найз нөхөд, АН-ын батлахтай хүмүүсийг ажилд томилдог болж, бидний ажлын байр тодорхой мөнгөн ханштай болсон тул ийн дүгнэхээс өөр аргагүйд хүрэв. Монгол Улсын ирээдүйг бэлтгэдэг Боловсролын салбарт мөнгөн ханш тогтож, бизнес ханхалж, үнэ цэнэ нь буурах ийм бусармаг ажлыг Нийслэлийн Засаг даргын орлогч Ц.Энхцэнгэл, Нийслэлийн Боловсролын газрын дарга Ц.Отгонбагана нар гардан үйлдэж, үүнийгээ Нийслэлийн Засаг дарга Таны захирамжаар үйлдэж байгаа хэмээн тайлбарлаж суугааг Та мэдээгүй, дуулаагүй яваа байх.
Нийслэлийн Засаг дарга Э.Бат-Үүл Та Монголын ардчилалд хувь нэмрээ оруулсан гавьяатай, Монгол Улсын Баатар цолтой эрхэм. Үүний нэгэн адил энэхүү захидлыг илгээж буй миний бие бахархах олон мянган шавьтай, Монгол Улсын аварга багш цолтой нэгэн. Миний бие өнөөдөр Нийслэлийн Засаг даргын орлогч Ц.Энхцэнгэл, Нийслэлийн боловсролын газрын дарга Ц.Отгонбагана нарын хэрэгжүүлсэн завхралын золиос болсон тул Боловсролын салбарт гарч байгаа хэлмэгдүүлэлт, гажигийг нягтлан таслан зогсооно уу хэмээн Танд хандаж байгаа болно. Ажлын байрны халдлага дээрэм, удирдах ажилтны дарамтад өртсөн Боловсролын салбарын төлөөл нь ганцхан би биш. Ийм эмгэнэлтэй, хошин адал явдлын өрнөлд Улаанбаатар хотын олон цэцэрлэг сургуулийн удирдлага өртсөн гэдгийг дээр дурдсан. Үнэн хэрэгтээ Улаанбаатар хотын ЕБС, цэцэрлэгийн захирал, эрхлэгч, сургалтын менежер, арга зүйчийг сонгон шалгаруулах ажил нь хэр тооцоо судалгаатай, үр өгөөжтэй ажил вэ гэдгийг Та сонирхож үзсэн үү. Үүнийг тойрсон шилжилт хөдөлгөөний улмаас Монгол Улсын хойч ирээдүй болох хүүхдүүд хохирч буйг Та мэдэх үү.
Миний бие Нийслэлийн 62 дугаар дунд сургуулийн захирлаар ажиллаж байгаад Сонгон шалгаруулалт нэртэй хэлмэгдүүлэлтэд өртөн 2014 оны гуравдугаар сард ажлаа өгсөн болно. Энэхүү Сонгон шалгаруулалт илт хууль бус болсон, шалгалтыг эхний хүнээс 0.08 онооны зөрүүтэй өгч, хоёрдугаар байрт орсон юм. Миний ажлын байрыг авсан хүн Сонгон шалгаруулалтын нэг төрөл болох ярилцлагын шалгалтад ороогүй хэрнээ энэ шалгалтад орсон 60 орчим өрсөлдөгчөөс хамгийн өндөр оноог авсан байдаг. Энэ нь тэгээд Монголын Боловсролын салбарын Сонгон шалгаруулалтыг үнэлж байгаа бодит үнэлгээ мөн үү. Тиймээс миний бие Захиргааны хэргийн шүүхэд гомдол гаргасан. Энэхүү асуудлыг гурван шатны шүүх хянан хэлэлцээд намайг ажилд нь эргүүлэн томилох, ажилгүй байх хугацааны цалинг нөхөн олгох, Нийслэлийн 62 дугаар дунд сургуулийн захирлын ажлын байранд Сонгон шалгаруулалт зарлах шаардлагагүй гэсэн шийдвэр гаргаад буй. Гэвч миний бие ажилдаа орох боломжгүй байна. Учир нь Ц.Энхцэнгэл, Ц.Отгонбагана нар Монгол Улсын дээд шүүхийн тогтоолоос давсан захирамж гаргахаар улайрч байна. Энэ бүгдийг тайлбарлах үүднээс Ц.Энхцэнгэл, Ц.Отгонбагана нартай цөөн биш удаа дараа уулзахад тэд надаар тохуу хийн доромжилж, зарим үед тавлан харьцсаныг Танд дуулгая. Удирдах албан тушаалтны наад захын соёл, ёс зүйгүй, хууль эрх зүйг дорд үзсэн ийм албан тушаалтнуудын захирамжийг Нийслэлийн Засаг дарга та мэдэлгүй гарын үсгээ зурж баталгаажуулах гэж байна.
Үр дүнд нь нэг сургууль, цэцэрлэг хоёр захирал, хоёр эрхлэгчийн цалин өгөхөөр болж, Нийслэлийн боловсролын газар болон улсын төсөв их хэмжээний хөрөнгөө үр дүнгүй “саалгаж” эхэллээ. Эдийн засгийн хямрал нүүрлэж, бүх хүн сэтгэл зүйгээ бүсээ чангалахад зориулж, хэмнэж байхад Нийслэлийн Боловсролын газар ганцаараа төсвийн хөрөнгийг гарынхаа салаагаар урсгах ёстой юм гэж үү! Монгол Улсад хариуцлагын тогтолцоо гэж байна уу. Улс орны эдийн засагт ачаа өгсөн хариуцлагагүй алхамын бурууг Ц.Энхцэнгэл, Ц.Отгонбагана нар хүлээхгүй. Тэд энэхүү завхрал, эмгэнэлээ нууцлан бүрэн эрхийнхээ хүрээнд шийдвэр боловсруулж түүндээ Танаар гарын үсэг зуруулах гэж байна. Өөрөөр хэлбэл тэд Таны гараар могой бариулж байна.
Э.Бат-Үүл дарга Та Монголын Ардчилалд, Улаанбаатар хотын ирээдүйд итгэдэг шиг би Монголын боловсролын ирээдүйд итгэдэг. Таныг Нийслэлийн Засаг даргын орлогч Ц.Энхцэнгэл, Нийслэлийн Боловсролын газрын дарга Ц.Отгонбагана нарын бусармаг үйлдлийг хэн нэгэнд даатгалгүй, өөрийн биеэр шалгах, Сонгон шалгаруулалт нэрийн дор хохирч үлдсэн захирал, эрхлэгч, сургалтын менежер, багш нартай цаг гарган уулзаж, тэдний алдааг залруулсан ухаалаг шийдвэр гаргана гэдэгт найдаж байна. Дашрамд дурдахад Нийслэл төдийгүй Монгол Улсын хэмжээнд Сонгон шалгаруулалтын улмаас хохирсон ЕБС-ын захирал, цэцэрлэгийн эрхлэгч, сургалтын менежер, арга зүйч, багш нарыг алдагдсан эрх ашгийнхаа төлөө хамтран ажиллахыг уриалж байна. Мөн бидний адил хохирч буй бусад салбарын боловсон хүчнүүд бидэнтэй холбоо барина уу. Монгол Улсын ирээдүйн төлөө гарах гарцаа хамтран тодорхойлцгооё.
Холбогдох утас 96651239
Таныг хүндэтгэсэн: Нийслэлийн Сонгинохайрхан дүүргийн иргэн Ш.Сарантуяа
Эх сурвалж: http://www.everyday.mn/
