Өвөлжилтийн бэлтгэлээ базааж байна

Өвөлжилтийн бэлтгэл ажлыг хангах зорилтын хүрээнд улсын хэмжээнд хадлан бэлтгэлд 5529 хадуур, тармуур бүхий дугуйт трактор, 1100 морин хадуур, тармуур, 15000 гар болон хөдөлгөөнт хадуур, 470 хаман боогч ажиллаж, өнөөдрийн байдлаар 120.0 мянган тн өвс, 261.1 тн гар тэжээл бэлтгэсэн нь төлөвлөсөн өвсний 10 хувийг эзэлж байна.
Энэ жилийн хувьд нутгийн төв хэсгээр гандуу, зуншлага тааруу байсан нь малын хадлан, тэжээл бэлтгэхэд багагүй хүндрэл учруулаад байсан. Тэгвэл гантай байсан Төв, Сэлэнгэ, Дархан-Уул, Булган, Архангай аймгуудыг Дорнод аймагт 500 га , Сүхбаатар, Хэнтий аймагт 135 га талбайгаас хадлан бэлтгэх Засгийн газрын тогтоол гарсан. Өнөөдрийн байдлаар дээрх аймгуудаас Дорнодод 60, Сүхбаатарт 50, Хэнтий аймагт 20 гаруй хадлангийн салаа гэрээний дагуу ажиллаж байна.
Энэ намрын ургацын урьдчилан балансаас тооцон, гурилын үйлдвэрүүдэд шилжиж буй улаанбуудайнаас 58.0 мянган тн хивэг, 12.6 мянган тн багсармал тэжээл, 53.0 мянган тн ногоон тэжээл нийлүүлэгдэхээр байгаа нь малын хүчит тэжээлээр дотоодын хэрэглээг хангах боломжтой байгааг харуулж байна.
Харин бэлчээрийн даацын тухайд Цаг уурын хүрээлэнгээс баг тус бүрээр тооцоолон гаргасан мэдээллээс харахад, ирэх өвөл, хавар нийт нутгийн 60 хувьд бэлчээр хүрэлцээтэй, 40 хувьд даац олон дахин хэтэрсэн байна. Даац олон дахин хэтэрсэн Увс, Баян-Өлгий, Архангай, Өвөрхангай, Булган, Баянхонгор аймгийн ихэнхи сумд, Ховд, Говь-Алтай, Хөвсгөл, Төв, Хэнтий аймгуудын зарим сумд эртнээс отор, нүүдлээ зохицуулах, өвөлжих малынхаа тоог цөөлөх, хадлан тэжээлээ хангалттай хэмжээгээр бэлтгэж, малаа тэжээж онд оруулахад бэлтгэх зэрэг арга хэмжээ авах шаардлагатай байна.
Цаг агаарын төлөв байдлын хувьд, энэ сарын 1-нд баруун болон төвийн нутгийн хойд хэсгээр, 2-нд баруун зүгийн нутгаар, 3-нд баруун болон төвийн нутаг, говийн нутгийн баруун хэсгээр, 4-нд нутгийн зүүн хагаст бороо орно. Агаарын температур уулархаг нутгаар шөнөдөө 1-6 градус, өдөртөө 14-19 градус болж сэрүүсэх тул хадлан бэлтгэлийг 9 сарын 15-наас хэтрүүлэлгүй хийх нь зохимжтой байна.