Өглөө.мн Шинэ өглөө, Шинэ мэдээлэл
Сүүлийн жилүүдэд хоол үйлдвэрлэл, үйлчилгээний салбар хурдацтай хөгжих болсон. Үүнийг дагаад хүнсний түүхий эд, бүтээгдэхүүний аюулгүй байдлыг хангах, аялал жуулчлалтай уялдан үндэсний брэнд хоол, хүнсийг хөгжүүлэх, шинэ технологи, арга ажиллагаа, чанарын удирдлагын тогтолцоог нэвтрүүлэх зэрэг асуудлууд тулгамдаж байна.
Эдгээр асуудлыг шийдвэрлэх зорилгоор “Хоол үйлдвэрлэл, үйлчилгээний салбарын улсын II зөвлөгөөн”-ийг 50 жилийн дараа буюу энэ сарын 28-ны өдөр Монгол Улсын Ерөнхийлөгчийн ивээл дор Төрийн ордонд зохион байгууллаа. ХХААЯ-ны Хүнсний үйлдвэрийн бодлогын хэрэгжилтийг зохицуулах газрын дарга Ц.Баярмаа үг хэлж, зөвлөгөөнийг нээсэн юм. Мөн энэ үеэр Монгол улсын Ерөнхийлөгч Ц.Элбэгдоржийн илгээлтийг Амьдрах орчин, ногоон хөгжлийн бодлогын зөвлөх О.Чулуунбилэг танилцуулав. Тэрбээр хүний амьдралын хэв маяг, ажил хөдөлмөртэй холбоотой өөрчлөлтүүд гарч, гадуур хооллолтыг илүүд үзэн нөгөө талаар зөв зохистой хооллолтын талаарх хүн амын мэдлэг, хандлага дээшилсэн нь энэ салбарын ажилтан ажилчдаас өндөр мэдлэг, ур чадварыг шаардах болсныг дурдаад Зөвлөгөөнөөс гарах уриалга, зөвлөмжийг биелүүлж ажиллахын төлөө та бүхний хамтын ажиллагаа, хичээл зүтгэл, чин сэтгэл, эв нэгдэл туйлаас чухал гэдгийг онцлон тэмдэглэв.
Зөвлөгөөнд ХХАА-н сайд Р.Бурмаа оролцож, мэндчилгээ дэвшүүлж хэлсэн үгэндээ салбарын хөгжилд томоохон хувь нэмэр болох олон улсын жишигт нийцсэн мах, махан бүтээгдэхүүн, төмс, хүнсний ногооны хагас боловсруулсан, бэлдэцийн үйлдвэрийг байгуулах, хоол үйлдвэрлэл, үйлчилгээний салбарт Эрүүл ахуйн зохистой дадал, Үйлдвэрлэлийн зохистой дадал нэвтрүүлэхэд анхаарч ажиллах хэрэгтэй. Мөн хүн арддаа эрүүл, шимтэй, зохистой хоол, хүнсээр үйлчлэх эрхэм хүндтэй, хариуцлагатай энэ ажил үйлсэд нь ажлын амжилт, сайн сайхан бүхнийг хүсэн мэндчиллээ.
Тус зөвлөгөөн нь хөдөө орон нутаг, нийслэл хотын хоол үйлдвэрлэл, үйлчилгээний салбарт ажиллагсдын төлөөлөл болсон 1100 гаруй тогооч, зөөгч, менежер, ажилтнуудыг хамарсан өргөн цар хүрээтэй болсон байна. Зөвлөгөөний дараагаар хоол үйлдвэрлэл, үйлчилгээний салбарт тулгамдаж буй асуудлуудыг хэрхэн шийдвэрлэх талаарх зөвлөмжийг гаргасан юм.
Зөвлөгөөний үеэр төлөөлөгчид хоол үйлдвэрлэл, үйлчилгээний салбарт төрөөс баримтлах бодлого, хөтөлбөр, хууль эрх зүйн орчныг сайжруулах, ялангуяа одоо мөрдөгдөж буй стандарт, нормыг шинэчлэгдсэн хууль эрх зүйн орчинтой уялдуулан шинэчлэх, сайжруулах хэрэгтэй гэдгийг онцолж байлаа. Мөн Монгол үндэстний брэнд хоол, ундааны нэр төрлийг нэмэгдүүлэх, дэлхий дахинд сурталчлах зэргээр олон асуудлыг хэлэлцлээ.
