Э.Мөнхтөр:Хүний гоо сайхан дотоод сэтгэлдээ байдаг гэдгийг харуулахыг зорьсон

“Оюунлаг” продакшны дэлгэцийн тав дахь уран бүтээл болох “Царайлаг өдрүүд” инээдмийн уран сайхны кино өчигдөр Хүннү кино театрт нээлтээ хийлээ.Энэ үеэр киноны гол дүрд тоглосон жүжигчин  СТА Э.Мөнхтөртэй цөөн хором ярилцлаа.

– “Царайлаг өдрүүд” кино нээлтээ хийж байна. Та энэ киноны голд дүрд тоглосон. Энэ дүрээрээ юуг харуулахыг зорьсон бэ?

-“Царайлаг өдрүүд” киноны гол дүр болох Төгөлдөр гэдэг залуу төрөлхийн үсгүй, хөмсөггүй төслийн удирдагч залуу байгаа. Тэрээр өөрийнхөө гадаад үзэмжээс ичиж, өөртөө итгэлгүй болдог. Бас эргэн тойрныхон хүмүүс түүний байгаа байдлыг доромжилсноос болж өөртөө өөрчлөлт хийж, гоо сайхны мэс засалд орсон. Тэрээр гадаад төрхөө өөрчилбөл бүх зүйл өөрчлөгдөнө гэж бодсон. Гэвч өөрийнх нь бодсоноос тэс өөр үйл явдал болж хувирч өөрийнх нь танихаа больсон.

Энэхүү киногоор юуг харуулахыг зорьсон бэ гэвэл хүний гоо сайхан гаднаа харагдах байдал биш дотоод сэтгэлдээ байдаг юм гэдгийг энэ киногоор харуулахыг зорьсон байгаа.

Та “Оюунлаг” продакшны уран бүтээлчидтэй хамтарч ажиллаад цөөнгүй хугацаа өнгөрсөн. Энэ продакшнаас гадна ямар хүмүүстэй хамтарч уран бүтээл хийдэг вэ?

-Оюунлаг продакшны уран бүтээлчтэй хамтарч нэлээдгүй уран бүтээл хийсэн. Энэ продакшнаас гадна намайг цөөнгүй кинонд сонгож тоглуулсан Ж.Сэнгэдорж, Д.Галбаяр найруулагчийн хэд хэдэн кинонд хамтарч ажилласан. Эдгээр найруулагч нар ойлголцоход амар байдаг учраас намайг тоглуулдаг байх гэж боддог.

-Tа нэлээд олон кинонд гол дүрийг бүтээсэн эдгээр тоглосон кинонууд дундаас сэтгэл тань хүрсэн дүр байгаа юу?

-Би нэлээд олон кинонд гол дүр бүтээсэн. Одоогоор өөрийнхөө сэтгэлд хүрсэн дүр хараахан байхгүй байна. Гэхдээ кинонд тоглосныхоо дараа үзэхэд энэ үед тэгдэг байж гэх эргэлзээ төрдөг юм. Эсвэл нээлт нь дээр үзэхэд гоё санагдчихаад хэсэг хугацааны дараа өөрийгөө голдог.

-Та одоогоор ямар бүтээл дээр ажиллаж байна вэ?

-Одоо би нэг бүтээл ажиллаж байгаа гэхдээ хэлж зарлах болоогүй байгаа.Харин энэ хаврын бөгөөд зуны ажил бол аравдугаар сард Боловсрол суваг телевизээр гарах “Ээжүүд” хэмээх олон ангит кинонд дүр бүтээсэн.

-“A-Cappella” хамтлагийн бусад гишүүд одоо хаана, юу хийцгээж байгаа вэ?

-Манай хамтлагийн гишүүн болох Б.Одбаяр Америкийн Нью Йорк хотноо суралцаж байгаа. Бусад гишүүд маань өөрсдийнхөө хувь хувийн уран бүтээл, ажлуудаа хийцгээж байгаа. Бид нарт бол эргэж нийлж уран бүтээл хийх бодол байгаа гэхдээ арай болоогүй байх шиг байна.

Г.Нараа