Соёлын сайд Ч.Номин Баян-Өлгий аймгийн Соёл, урлагийн газрын үйл ажиллагаатай танилцлаа

Соёлын сайд Ч.Номин Баян-Өлгий аймагт ажиллах үеэрээ аймгийн Соёл, урлагийн газар болон номын сан, Монгол-Алтайн хадны зургийн цогцолборын хамгаалалтын захиргааны үйл ажиллагаатай тус тус танилцлаа.

Монгол Улсын Засгийн газраас аймаг, орон нутгийн соёлын үйлчилгээний чанар, хүртээмжийг нэмж, хүн амыг бүх нийтийн соёлын боловсролоор дамжуулан соён гэгээрүүлэх, соёлын өвөө хамгаалах, соёлын бүтээлч үйлдвэрлэлийг дэмжих бодлого баримталж байгаа билээ.

Энэ хүрээнд Соёлын яам аймаг, орон нутагт байх соёл урлагийн газруудыг эмхлэн байгуулж байгаа бөгөөд Баян-Өлгий аймгийн Соёл, урлагийн газрын үйл ажиллагаа жигдэрч,  Үндэсний нэгдмэл үнэт зүйл, бүх нийтийн соёлын боловсрол, соёлын бүтээлч үйлдвэрлэл зэрэг соёлын тэргүүлэх бодлогоо хэрэгжүүлж эхэлсэн байна.

Соёлын сайд Ч.Номин аймгийн соёл, урлагийн газрын үйл ажиллагаатай танилцах үеэрээ Засгийн газрын хэрэгжүүлж буй Шинэ сэргэлтийг бодлогыг танилцуулсан бөгөөд аймаг орон нутгийн онцлогт тулгуурласан соёлын үйл ажиллагаа явуулахыг даалгасан юм. Тухайлбал, Баян-Өлгий аймагт Казах, Урианхай, Тува зэрэг ястан, угсаатан байдаг тул соёлын олон төрлийг тэгш хүртээмжтэй хөгжүүлэх бодлогыг төлөвлөн хэрэгжүүлэхийг даалгасан юм.

Соёлын сайд Ч.Номин Соёл, урлагийн газрын үйл ажиллагаатай танилцаж, соёлын ажилтнуудтай уулзсаны дараа аймгийн соёл, урлагийн салбарт олон жил үр бүтээлтэй ажиллаж буй соёлын ажилтан, авьяастнуудыг шагнаж урамшуулав.

Соёлын сайдын тушаалаар аймгийн Хөгжимт драмын театрын дарга Ж.Сайгулик, ахмад уран бүтээлч К.Канат, Хилийн цэргийн 165 дугаар ангийн Соёлын төвийн эрхлэгч Д.Гэгээнбаяр, Дэлүүн сумын 1 дүгээр сургуулийн дүрслэх урлагийн багш Д.Солтаншарив нарыг Монгол Улсын Соёлын тэргүүний ажилтан цол тэмдэгээр, аймгийн Соёл, урлагийн газрын ахлах мэргэжилтэн Д.Эркешийг Соёлын яамны жуух бичгээр тус тус шагналаа.