“Хаврын баярын гайхамшигт аялгуу” симфони хөгжмийн тоглолт болно

Шинэ оны босгон дээр ДБЭТ,  Хятадын Соёлын төвтэй хамтран “Хаврын баярын гайхамшигт аялгуу” симфони хөгжмийн тоглолтыг энэ  сарын 8-нд үзэгч түмэндээ хүргэх гэж байна.

 Энэхүү хоёр орны хамтарсан тоглолт нь энэ жил тохиож буй ДБЭТ-ын симфони найрал хөгжмийн 90 жилийн ойд зориулан хийж байгаа томоохон тоглолт гэдгээрээ онцлог юм.

 Уг тоглолтонд дэлхийн болон Хятад, Монголын хөгжмийн зохиолчдын ард түмний чихэнд хоногшсон гайхамшигт аялгуунуудаас тоглох аж. Концертыг ДБЭТ-ын ерөнхий удирдаач, Урлагийн гавьяат зүтгэлтэн Н.Туулайхүү удирдаж, хөгжимчин Соёлын тэргүүний ажилтан Ц.Мөнхболд,  Ч.Мөнх-Эрдэнэ нар гоцлон, симфони найрал хөгжим хөгжимдөж, энэ үдэш үзэгчдийн сонорыг мялаах юм.

 Тоглолтонд Монголын сор болсон бүтээлүүд болох З.Хангалын “Салхит шувуу”, Л.Мөрдоржийн “Алтан өргөө” киноны хөгжим, Б.Дамдинсүрэн “Хэнтийн өндөр ууланд”, Ж.Чулуун “Уран Хас” балетын вальс, дэлхийн шилдэг бүтээл болох И.Валдьтефулын “Скэйтерс вальс”, Ж.Россинийн “Севилийн үсчин” дуурийн удиртгал, Г.Свиридовын “Метель” цувралын вальс, И.Штраусын “Радецкий марш”, Хятадын хөгжмийн зохиолчид болох Эрда “Симфони сюит”, Ли Шисян “Симфони найруулга”, Лиан Шанбо “Хос эрвээхий” ятга хөгжмийн гоцлол зэрэг гайхалтай бүтээлүүд  эгшиглэх болно.