Өглөө.мн Шинэ өглөө, Шинэ мэдээлэл
Их Британийн “BBC” телевизийн “Top Gear” шоу нэвтрүүлгийн хөтлөгч Жереми Кларксоныг ажлаас нь халсны дараа тус телевизийн ерөнхий захирал Тони Холлын амь насанд халдана гэсэн сүрдүүлэг иржээ.
Цагдаагийн эх сурвалжийн мэдээлснээр энэхүү заналхийлэл и-мэйлээр ирсэн бөгөөд одоогийн байдлаар уг шууданг гадны улс орнуудаас илгээсэн үү, дотроос илгээсэн үү гэдэг нь тодорхой бус байгаа гэнэ. Түүнчлэн хөдөлмөрийн гэрээгээ цуцлуулсан Жереми Кларксонтой холбоотой эсэхийг тогтоогоогүй байгаа юм. Харин уг заналхийлсэн мэдээлэл ирсэний дараа Тони Холлыг гэр бүлийнх нь хамт цагдаагийн хамгаалалтад авсан байна.
“Top Gear” шоу нэвтрүүлгийн тухайд дэлхийн 200 гаруй орны үзэгчдэд хүрдэг ба жилдээ 74 сая ам.долларын ашиг олдог томоохон нэвтрүүлэг юм. Харин хөтлөгч Жереми Кларксон нэвтрүүлгийн продьюсертэй удаа дараа маргалдаж, гар хүрсний улмаас “BBC” телевиз түүнтэй хийсэн гэрээгээ цуцлахад хүрсэн аж.
эх сурвалж: eagle.mn
