Өглөө.мн Шинэ өглөө, Шинэ мэдээлэл
“Шинэ яармаг” хорооллын барилгын ажлыг эхлүүлнэ
“Шинэ бүтээн байгуулалт” дунд хугацааны зорилтод хөтөлбөрийн хүрээнд “Шинэ яармаг” орон сууцны хороолол барих төслийг хэрэгжүүлэхэд шаардагдах 50 хүртлэх сая ам.доллартай тэнцэх санхүүжилтийг “Төрийн орон сууцны корпораци” ТӨҮГ-аар дамжуулан үе шаттайгаар санхүүжүүлэхийг Төрийн өмчийн хороо болон, Хөгжлийн банкны Төлөөлөн удирдах зөвлөлд үүрэг болгож, хэрэгжилтэд нь хяналт тавихыг Барилга, хот байгуулалтын сайд Д.Цогтбаатарт даалгалаа.
УИХ-ын тогтоолоор батлагдсан “Шинэ бүтээн байгуулалт” дунд хугацааны зорилтод хөтөлбөр, Засгийн газрын 2012-2016 оны үйл ажиллагааны хөтөлбөрийг хэрэгжүүлэх хүрээнд Хан-Уул дүүргийн 8 дугаар хорооны нутаг дэвсгэрт “Шинэ яармаг” төслийг хэрэгжүүлэхээр 2012 онд “Зээлийн ерөнхий хэлэлцээр”-ийг БНХАУ-ын Экспорт-Импорт банктай байгуулсан байна.
2015 онд төслийн нэгдүгээр үе шатны барилгын ажлыг эхлүүлэхэд 245 сая ам.долларын санхүүжилт шаардлагатай, үүнээс 195 сая ам.долларын зээлийн санхүүжилтийг БНХАУ-ын Экспорт-Импорт банк, үлдэх 15 хувь болон зээлийн бусад зардал нийт 50 сая ам.долларын санхүүжилтийг Төрийн орон сууны корпорациар дамжуулан Хөгжлийн банкны өөрийн эх үүсвэрээс санхүүжүүлнэ.
Шинэ суурьшлын бүсэд орон сууцны хорооллыг, нийгмийн байгууламжийн хамт цогцолбороор нь барихад урт хугацаатай, бага хүүтэй, гадаад эх үүсвэрээр санхүүжлүүлэх боломжийг бүрдүүлэх нь ач холбогдолтой гэж үзэж байна.
“Шинэ яармаг” төслийн I үе шат хэрэгжиснээр 368 мянган ам.метр талбай бүхий орон сууц, Мэргэжил сургалт үйлдвэрлэлийн төв, сургууль, цэцэрлэг бүхий хороолол байгуулагдах юм.
Эдийн засгийн хүндрэлээс гарах нарийвчилсан төлөвлөгөөг баталлаа
Эдийн засгийн хүндрэлээс гарах арга хэмжээний хөтөлбөрийг Засгийн газар боловсруулж, энэ оны 2 дугаар сард УИХ-ын тогтоолоор батлуулсан. Уг тогтоолын дагуу Эдийн засгийн хүндрэлээс гарах нарийвчилсан төлөвлөгөөг баталж, энд тусгагдсан зорилт, арга хэмжээг шуурхай хэрэгжүүлж ажиллахыг Засгийн газрын гишүүдэд үүрэг болголоо. Төлөвлөгөөний хэрэгжилтийн явц, үр дүнгийн талаар улирал тутамд Засгийн газрын хуралдаанд танилцуулахыг Сангийн сайд Ж.Эрдэнэбатад даалгалаа.
Яамд, агентлагууд, Монгол банк, Санхүүгийн зохицуулах хороо, Ерөнхий сайдын дэргэдэх Эдийн засгийн зөвлөл, Төрийн бус байгууллагууд, мэргэжлийн холбоодоос энэ хөтөлбөрийн хүрээнд хэрэгжүүлэх нь зүйтэй гэж үзсэн нийт 592 саналыг нарийвчилсан төлөвлөгөөнд тусгуулахаар ирүүлсэн байна.
Эдгээр саналуудаас давхардсан болон Монгол Улсын эдийн засаг, нийгмийн хөгжлийн өнөөгийн түвшин, хөтөлбөртэй шууд уялдаагүй саналуудыг агуулгын хувьд нийцүүлэн заримыг нь хассан бөгөөд нарийвчилсан төлөвлөгөөнд 220 орчим санал, үйл ажиллагааг тусгажээ.
Татварын торгууль, алдангийн хариуцлагын заалтыг боловсронгуй болгоно
Татварын ерөнхий хуулиар ногдуулж буй торгууль, алдангийн заалтыг боловсронгуй болгох чиглэлээр Татварын ерөнхий хуульд нэмэлт, өөрчлөлт оруулах тухай хуулийн төслийг хэлэлцээд үзэл баримтлалыг баталж, хуулийн төслийг УИХ-д өргөн мэдүүлэхийг Сангийн сайдад даалгалаа.
Энэ хууль батлагдвал татвараа үнэн зөв ногдуулсан боловч хугацаанд нь төлөөгүй татвар төлөгчид хүлээлгэх торгуулийн дарамт байхгүй болно. Мөн НӨАТ-ын тухай хуулийн дагуу торгууль, хүү ногдуулж буй хариуцлагын заалтыг Татварын ерөнхий газрын хариуцлагын заалтад нэгтгэснээр татварын зөрчилд ногдуулж буй хариуцлага давхардалгүй, хугацааны хүчин зүйлийг тооцсон ойлгомжтой байдлаар үйлчлэх болно гэж үзэж байна.
Архангайн Эрдэнэбулганд 120 хүүхдийн цэцэрлэг барина
Архангай аймгийн Эрдэнэбулган сумын 4 дүгээр цэцэрлэгийн өргөтгөл болох 120 хүүхдийн цэцэрлэгийн шинэ барилгыг Монгол Улсын Засгийн газарт БНХАУ-ын Засгийн газраас олгох буцалтгүй тусламжийн хөрөнгөөр барихыг Сангийн сайд Ж.Эрдэнэбат, БСШУ-ы сайд Л.Гантөмөр нарт зөвшөөрлөө.
Засгийн газрын энэ оны 1 дүгээр сарын 19-ний хуралдаанаар БНХАУ-ын Засгийн газрын 300 сая юанийн буцалтгүй тусламжаар хэрэгжүүлэх төсөл, арга хэмжээний талаар хэлэлцэн нийслэл, орон нутагт 21 сургуулийн барилгыг шинээр барих болон өргөтгөхөөр шийдвэрлэсэн.
БНХАУ-аас манай улсад суугаа Элчин сайд дээрх тусламжийн хөрөнгөөр Архангайн Эрдэнэбулган сумын “Монгол-Хятадын найрамдлын нэрэмжит” 4 дүгээр цэцэрлэгийн барилгад өргөтгөл барих хүсэлт ирүүлжээ. Тус цэцэрлэг нь 90 орчим хүүхэд хүлээн авах чадалтай ч хамран сургах тойргийн хүүхдүүд сургуулийн өмнөх боловсролын үйлчилгээнд бүрэн хамрагдаж чаддаггүй байна.
Энэхүү цэцэрлэгийн өргөтгөл барих төслийг нэмснээр Хятадын Засгийн газрын буцалтгүй тусламжаар 22 сургууль, цэцэрлэгийн барилгыг шинээр буюу өргөтгөхөөр болж байна.
Хонь, тэмээний ноос тушаасан малчдад мөнгөн урамшуулал олгох журмыг шинэчиллээ
Хонины ноос, тэмээний ноос бэлтгэж үндэсний үйлдвэрт тушаасан хоршооны гишүүн малчин, мал бүхий этгээдэд мөнгөн урамшуулал олгох журмыг шинэчлэн баталлаа.
Ноос боловсруулдаг үндэсний үйлдвэр, цехэд тушаасан ноосонд урамшуулал олгохдоо ноосны чанар, боловсруулах үйлдвэрийн эрэлт хэрэгцээнд үндэслэн нарийн, нарийвтар, бүдүүвтэр ноост хонины болон тэмээний самнаж бэлтгэсэн ноосны кг тутамд 2000, Төв, Сэлэнгэ, Дархан-Уул, Булган, Хэнтий аймгаас бусад бүс нутагт үржүүлж байгаа бүдүүвтэр ноост болон нутгийн монгол хонины ноосны кг тутамд 1000, хяргаж бэлтгэсэн тэмээний ноосны кг тутамд 1000 төгрөгийн урамшуулал тус тус олгохоор журамд заажээ.
Ноосны чанараас хамаарсан ялгавартай урамшууллыг олгодог болсноор нарийн, нарийвтар ноост хонины тоо толгойг нэмэгдүүлэх, үйлдвэрийн эцсийн бүтээгдэхүүний чанарыг сайжруулж, экспортыг нэмэгдүүлэх эдийн засгийн хөшүүрэг бий болж, энэ нь улсын эдийн засгийн өсөлтөд эерэг нөлөө үзүүлнэ гэж үзэж байна.
Шүүхийн шийдвэр гүйцэтгэх тухай хуулийн шинэчилсэн найруулгын төслийг УИХ-д өргөн мэдүүлнэ
Шүүхийн шийдвэр гүйцэтгэх тухай хуулийн шинэчилсэн найруулгын төслийг хэлэлцээд Засгийн газрын гишүүдээс гаргасан саналыг тусгаж, УИХ-д өргөн мэдүүлэхээр тогтлоо.
2002 оны Шүүхийн шийдвэр гүйцэтгэх тухай хууль батлагдсанаас хойш нийгэм, эдийн засгийн хөгжлийг дагасан шинэ харилцаа үүссэн, хуулийн хэрэгжилттэй холбоотой зарим хүндрэлийг арилгаж, зохих өөрчлөлт хийх шаардлагатай болжээ.
Энэ хүрээнд хүчин төгөлдөр үйлчилж буй Шүүхийн шийдвэр гүйцэтгэх тухай хуулийн иргэний хэргийн талаарх шүүхийн шийдвэр гүйцэтгэх ажиллагаанд холбогдох зохицуулалтыг хэвээр хадгалж, захиргааны шүүхийн шийдвэр гүйцэтгэх ажиллагааны журмыг нэмж тусган, эрүүгийн хэргийн талаарх шүүхийн тогтоол гүйцэтгэх ажиллагааг бүхэлд нь шинэчлэн найруулж, Эрүүгийн хуулийн шинэчилсэн найруулгын төсөл, Эрүүгийн хянан шийдвэрлэх тухай хуулийн төсөлтэй уялдуулжээ.
Ингэснээр эрүүгийн хариуцлага гарцаагүй байх, үр нөлөөтэй хэрэгжих нөхцөл бүрдэж, хорих ял эдэлсэнтэй холбоотой хувь хүнд үүсэх сөрөг үр дагавар буурна гэж үзэж байна.
НӨАТ-ын урамшууллын системийг хөгжүүлэх төслийн талаар танилцууллаа
Нэмэгдсэн өртгийн албан татварын урамшууллын системийг хөгжүүлэх төслийн явцын талаар Сангийн сайд Засгийн газрын гишүүдэд танилцууллаа.
Үүнтэй холбогдуулан “Нэмэгдсэн өртгийн албан татварын урамшууллын систем”-ийн үйл ажиллагааг Төслийн ерөнхий төлөвлөгөөнд заасан хугацаанд хүлээн авч, ашиглалтад оруулахыг Татварын ерөнхий газрын даргад даалгав.
Засгийн газрын тогтоолын дагуу тус газрын дэргэд “НӨАТ-ын урамшууллын системийг хөгжүүлэх” төслийн нэгж ажиллаж байна.
Энэ систем нь иргэн худалдаа, үйлчилгээ эрхлэгч НӨАТ төлөгч аж ахуйн нэгжээр үйлчлүүлэхдээ бэлэн мөнгөөр худалдан авалт хийх үедээ урамшууллын сугалаанд оролцох, төлбөрийн картандаа буцаан олголт авах зэрэг боломж олгожээ.
Товч мэдээ
· “Рашаант дахь улсын нөөцийн агуулах төсөл”-ийн концессын гэрээг “Нейшл трейдинг энд транспорт групп” ХХК-тай байгуулахыг Хөрөнгө оруулалтын газарт олгож, гэрээ байгуулах холбогдох хууль тогтоомжийн дагуу удирдан зохион байгуулахыг Аж үйлдвэрийн сайд Д.Эрдэнэбатад даалгалаа.
· Татварын ерөнхий хууль, Ашигт малтмалын тухай хууль, Аж ахуйн нэгжийн орлогын албан татварын тухай хуульд нэмэлт оруулах тухай хуулиудын төслийг хэлэлцээд УИХ-д өргөн мэдүүлэхээр тогтлоо.
· Буцалтгүй тусламжийн хөрөнгөөр хэрэгжүүлэх Монгол Улсын Засгийн газар, Швейцарийн Холбооны улсын Засгийн газар хооронд байгуулах “Засаглалыг дэмжих, төвлөрийг сааруулах” хөтөлбөрийн хоёрдугаар үе шатыг хэрэгжүүлэх хэлэлцээр, Монгол Улсын Засгийн газар, Дэлхийн банкны хооронд байгуулах “Бодлогын дүн шинжилгээ, хяналт шинжилгээний чадавхийг бэхжүүлэх” төслийн гэрээнд гарын үсэг зурах бүрэн эрх олгох тухай Ерөнхий сайдын захирамж гаргана.
· Засгийн газраас 2014 оны 5 дугаар сарын 19-нд УИХ-д өргөн мэдүүлсэн Нэмэгдсэн өртгийн албан татварын тухай хуулийн шинэчилсэн найруулгын төсөлд нэмэлт санал оруулах тухай асуудлыг дэмжээд саналыг хуулийн төсөлд тусгуулахаар УИХ-ын холбогдох байнгын хороотой зөвшилцөхийг Сангийн сайдад даалгалаа.
· Богдхан уулсын дархан цаазат газрын ойр орчмыг улсын тусгай хэрэгцээнд авах асуудлыг судалж, санал боловсруулах, үүнтэй холбогдуулан иргэн, хуулийн этгээдийн эзэмшилд байгаа газрыг солих буюу эргүүлэн авах тохиолдолд олгох нөхөн олговрын хэмжээг тооцох, шинэ суурьшлын бүсэд эдийн засгийн дэд бүтэц бий болгоход шаардагдах хөрөнгийн тооцоог гаргах, энэ чиглэлээр холбогдох хууль тогтоомжид өөрчлөлт оруулах хуулийн төсөл боловсруулах үүрэг бүхий Ажлын хэсэг байгууллаа.
· Залуучуудын хөгжлийн асуудлаарх үндэсний хорооны дүрмийг баталж, хорооны үйл ажиллагааг удирдан зохион байгуулахыг үндэсний хорооны дарга, ХАХНХ-ын сайд С.Эрдэнэд даалгалаа.
· Гол мөрний урсац бүрэлдэх эхийн бүсэд олгосон тусгай зөвшөөрлийг цуцлах, усны сан бүхий газрын энгийн хамгаалалтын бүсэд олборлолт явуулж эхэлсэн, тусгай зөвшөөрөл бүхий талбайд холбогдох арга хэмжээ авах, нөхөн сэргээлт хийлгэх журам“-ын хэрэгжилтэд хяналт тавьж ажиллахыг Уул уурхайн сайд Р.Жигжид, БОНХАЖ-ын сайд Д.Оюунхоролд даалгалаа.
· Архидан согтуурахтай тэмцэх тухай хуульд нэмэлт, өөрчлөлт оруулах тухай төслийг хэлэлцээд УИХ-д өргөн мэдүүлэхээр тогтлоо.
· Малын индексжүүлсэн даатгалын нэгдүгээр босго болон хоёрдугаар босго үзүүлэлтийг мөрдүүлж ажиллахыг Сангийн сайдад даалгаж, хяналт тавьж ажиллахыг Санхүүгийн зохицуулах хорооны даргад зөвлөжээ.
· Хууль тогтоомж, Засгийн газрын шийдвэрийн хэрэгжилтийн 2014 оны жилийн эцсийн дүнг Монгол Улсын сайд, Засгийн газрын Хэрэг эрхлэх газрын дарга С.Баярцогт танилцууллаа.
· Монгол Улсын эдийн засаг, нийгмийг 2014 онд хөгжүүлэх үндсэн чиглэлийн биелэлтийг хэлэлцээд УИХ-д өргөн мэдүүлэхээр тогтлоо.
· “Эдийн засгийн хүндрэлээс гарах арга хэмжээний хөтөлбөр”-ийн хэрэгжилтийн явцыг хэлэлцэн Засгийн газрын гишүүдийн гаргасан саналыг тусгахаар тогтов.
· АНУ-ын Вашингтон хотноо өнгөрөгч сард зохион байгуулагдсан хөгжлийн бэрхшээлтэй хүний хууль эрх зүйн орчин, түүний хэрэгжилт болон Японы нийгмийн хамгааллын тогтолцоотой танилцах арга хэмжээнд оролцсон дүнг ХАХНХ-ын сайд С.Эрдэнэ танилцууллаа.
· Төсвийн тогтвортой байдлын тухай хуульд нэмэлт оруулах төслийг дэмжиж УИХ-ын хуралдаанд нэн яаралтай хэлэлцүүлэхээр тогтлоо гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
