Зугаацахын тулд арал худалдан авчээ

Венди Вэй Мэй Ву хэмээх Хятадын тэрбумтан эмэгтэй Шинэ Зеландын Коромандел хойгоос дөрвөн км-ийн зайд оршин нэгэн арлыг 7.5 сая ам.доллараар худалдан авчээ. Слиппер нэртэй уг арал 2.7 км-ийн урт, 1.8 км-ийн өргөнтэй бөгөөд арал дээр зургаан тансаг зэрэглэлийн байшин, наран шарлагын газар буй аж.

Уг арал 45 жилийн турш Нидхемийн гэр бүлийн эзэмшилд байсан юм байна. Одоогоор Слиппер арлыг жуулчдад түрээслүүлж байгаа бөгөөд арал дээр нэг хонохын тулд 250-750 ам.доллар төлдөг аж.

Харин нууцлаг тэрбумтан Венди Вэй Мэй Вугийн охин “Ээж маань арлыг зөвхөн амарч, зугаацах зорилгоор худалдаж авсан. Ирээдүйд арал дээр юу хийх талаар тодорхой төлөвлөөгүй” хэмээжээ. Энэ нууцлаг хатагтай 2010 онд Шинэ Зеландын Аукланд дахь “Fairholme” харшийг 15 сая ам.доллараар худалдан авч шуугиан тарьж байжээ.

эх сурвалж: eagle.mn