Тэтгэврийн даатгалын шимтгэлийн нэрийн дансны тухай хуульд нэмэлт орууллаа

Монгол Улсын Их Хурлын 2015 оны хаврын ээлжит чуулганы өнөөдрийн /2015.05.14/ үдээс өмнөх нэгдсэн хуралдаанаар Засгийн газраас энэ оны 4 дүгээр сарын 10-ны өргөн мэдүүлсэн Тэтгэврийн даатгалын шимтгэлийн нэрийн дансны тухай хуульд нэмэлт оруулах тухай хуулийн төслийн анхны хэлэлцүүлгийг хийсэн юм. Хуулийн төслийг анхны хэлэлцүүлэгт бэлтгэсэн талаарх Нийгмийн бодлого, боловсрол, соёл, шинжлэх ухааны байнгын хорооны санал, дүгнэлтийг Улсын Их Хурлын гишүүн Д.Хаянхярваа танилцуулав.

Хуулийн төслийг Төсвийн байнгын хороо энэ сарын 06-ны өдрийн хуралдаанаараа хэлэлцэж санал, дүгнэлтээ ирүүлсэн бөгөөд зарчмын зөрүүтэй санал гаргаагүй аж. Харин Нийгмийн бодлого, боловсрол, соёл, шинжлэх ухааны байнгын хороо хуулийн төслийн анхны хэлэлцүүлгийг энэ сарын 12-ны өдрийн хуралдаанаараа хэлэлцэхэд гишүүдээс зарчмын зөрүүтэй санал гараагүй бөгөөд Улсын Их Хурлын гишүүн Ц.Оюунгэрэл хуулийн төслийг анхны хэлэлцүүлгээр нь батлуулах горимын санал гаргаж, хуралдаанд оролцсон гишүүд санал нэгтэйгээр дэмжжээ. Түүнчлэн Тэтгэврийн даатгалын шимтгэлийн нэрийн дансны тухай хуульд нэмэлт оруулах тухай хуулийн дагаж мөрдөх хугацааг ердийн журмаар тогтоох нь зүйтэй гэж үзсэн байна.

Байнгын хорооны санал, дүгнэлттэй холбогдуулан гишүүдээс асуулт, санал гараагүй тул байнгын хорооны горимын саналаар санал хураалгахад чуулганы нэгдсэн хуралдаанд оролцсон гишүүдийн 68 хувь нь дэмжсэн юм. Иймээс хуулийн төслийг бүхэлд нь батлах санал хураалт явуулахад нэгдсэн хуралдаанд оролцсон 52 гишүүний 35 нь буюу 67.3 хувь нь дэмжлээ.

Дараа нь Төсвийн тухай хуульд нэмэлт, өөрчлөлт оруулах тухай, Хүний хөгжил сангийн тухай хуульд өөрчлөлт оруулах тухай хуулийн төслүүдийн анхны хэлэлцүүлгийг хийлээ. Засгийн газраас энэ оны 4 дүгээр сарын 10-ны өргөн мэдүүлсэн эдгээр хуулийн төслийн анхны хэлэлцүүлэгт бэлтгэсэн талаарх Төсвийн байнгын хорооны санал, дүгнэлтийг Улсын Их Хурлын гишүүн Улсын Их Хурлын гишүүн Б.Болор танилцуулсан юм. Байнгын хорооны санал, дүгнэлттэй холбогдуулан гишүүдээс асуулт, санал гарсангүй.

Байнгын хороо хуулийн төслийг анхны хэлэлцүүлэгт бэлтгэх явцад гишүүдээс зарчмын зөрүүтэй 4 санал гаргасныг тус бүрээр нь санал хураалгахад 62.3-71.2 хувийн дэмжлэг авлаа. Ингээд хуулийн төслийг эцсийн хэлэлцүүлэгт бэлтгүүлэхээр Төсвийн байнгын хороонд шилжүүлэв.

Чуулганы үдээс өмнөх нэгдсэн хуралдаанаар Үндсэн хуулийн цэцийн 2015 оны 05 дугаар дүгнэлтийг Улсын Их Хурал хүлээн авсантай холбогдуулан Шүүхийн захиргааны тухай болон Шүүгчийн эрх зүйн байдлын тухай хуулиудад өөрчлөлт оруулах тухай хуулийн төслүүдийг хэлэлцэв. Энэ талаарх Хууль зүйн байнгын хорооны санал, дүгнэлтийг Улсын Их Хурлын гишүүн Х.Тэмүүжин танилцуулсан юм.

Улсын Их Хурал Үндсэн хуулийн цэцийн 05 дугаар дүгнэлтийг хүлээн авсан учраас шүүгчдийн цалинг хэрхэн шийдэх гэж байгааг тодруулахад Хууль зүйн байнгын хорооны дарга Д.Ганбат шүүгчдийн цалингийн тухай асуудлыг байнгын хорооны хуралдаанаар авч хэлэлцээд хуулийн төсөл санаачлахаар тогтсон, ойрын үед төсөл өргөн барьж хэлэлцүүлнэ гэсэн хариулт өгөв.

Ингээд хуулийн төслийг батлах санал хураалт явуулахад чуулганы нэгдсэн хуралдаанд оролцсон гишүүдийн 70.4 хувийн саналаар Шүүхийн захиргааны тухай хуульд өөрчлөлт оруулах тухай хуулийн төслийг, 68.5 хувийн саналаар Шүүгчийн эрх зүйн байдлын тухай хуульд өөрчлөлт оруулах тухай хуулийн төслийг баталлаа.

Чуулганы нэгдсэн хуралдаанаар Засгийн газраас өргөн мэдүүлсэн Монгол Улсын нэгдсэн төсвийн 2016 оны төсвийн хүрээний мэдэгдэл, 2017-2018 оны төсвийн төсөөллийн тухай хуулийн төслийн хэлэлцэх эсэх асуудлыг хэлэлцэж эхэллээ гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.