Өглөө.мн Шинэ өглөө, Шинэ мэдээлэл
“С.Ганбаяр, Т.Чинтогтох, Т.Шинэ-зориг, Н.Ганбадрал, Б.Намхай нар нь урьдчилан үгсэн тохиролцож бүлэглэн, шунахайн сэдэлтээр 2015 оны 01 дүгээр сарын 10-наас 11-нд шилжих шөнө Баянгол дүүргийн 2 дугаар хороо, 71б байрны 84 тоотод түр амьдарч байсан БНХАУ-ын иргэн Ван Жун Ли /WANG JUNLI/, Бан Жу Пин /BAN JIUFENG/ нарын мөнгө, эд зүйлийг нь дээрэмдэх гэмт хэргийг үйлдэхдээ уг хэргийг хялбарчлах, үйлдсэн хэргээ нуун далдлах зорилгоор, биед нь олон тооны шарх үүсгэн онц харгис хэрцгий аргаар санаатай алж 170.000.000 /нэг зуун далан сая/ төгрөг, 100.000 /нэг зуун мянган/ юань, гар цүнх, гар утас, түрийвч зэргийг авсан ба паспортыг нь шатааж устгасан” гэмт үйлдэлд Дүүргийн 2 дугаар прокурорын газраас Монгол улсын Эрүүгийн хуулийн тусгай ангийн 91-р зүйлийн 91.2.1, 91.2.6, 91.2.7, 91.2.11, 91.2.12, 91.2.16, Эрүүгийн хуулийн 36 дугаар зүйлийн 36.2 дэх хэсгийг журамлан 234-р зүйлийн 234.1 дэх хэсэгт зааснаар яллах дүгнэлт үйлдэж Дүүргийн эрүүгийн хэргийн анхан шатны 2 дугаар шүүхэд шилжүүлсэн байна.
Дээрх хэргийг шүүх 2015 оны 06 дугаар сарын 03-ны өдөр хянан хэлэлцээд, шүүгдэгч С.Ганбаяр, Б.Намхай нарт Монгол улсын Эрүүгийн хуулийн тусгай ангийн 91-р зүйлийн 91.2.1, 91.2.7, 91.2.11, 91.2.12, 91.2.16-аар 23 жил, Эрүүгийн хуулийн 36 дугаар зүйлийн 36.2 дэх хэсгийг журамлан 234-р зүйлийн 234.1 дэх хэсэгт зааснаар 3 сарын баривчлах ял оногдуулж хөнгөн ялыг хүндэд нь багтаан нийт 23 жилийн хорих ялыг чанга дэглэмтэй хорих ангид эдлүүлэхээр, шүүгдэгч Т.Чинтогтох, Т.Шинэ-зориг, Н.Ганбадрал нарт Монгол улсын Эрүүгийн хуулийн тусгай ангийн 91-р зүйлийн 91.2.1, 91.2.7, 91.2.11, 91.2.12, 91.2.16-аар 25 жил, Эрүүгийн хуулийн 36 дугаар зүйлийн 36.2 дэх хэсгийг журамлан 234-р зүйлийн 234.1 дэх хэсэгт зааснаар 3 сарын баривчлах ял оногдуулж хөнгөн ялыг хүндэд нь багтаан нийт 25 жилийн хорих ялыг чанга дэглэмтэй хорих ангид эдлүүлэхээр шийдвэрлэжээ.
