Үүлэнд нөлөөлж бороо оруулах хүсэлтийг дэмжив

Хүнс, хөдөө аж ахуйн сайд Р.Бурмаагийн тариалангийн бүс нутагт үүлэнд зориудаар нөлөөлж бороо оруулах хүсэлтийг Засгийн газрын ээлжит бус хурлаар дэмжив.

Хаврын тариалалт өнгөрсөн 5 дугаар сарын 3-наас эхэлж, өнөөдрийн байдлаар 384.2 мянган га-д үр тариа, 11.5 мянган га-д төмс, 5.7 мянган га-д хүнсний ногоо, 15.1 мянган га-д малын тэжээл, 69.9 мянган га-д тосны ургамал тариалж, нийт 486.6 мянган га-д тариалалт хийжээ. Үүний 357.5 мянган га-д улаанбуудай тариалсан нь сүүлийн жилүүдэд хүрч байгаагүй үзүүлэлт юм. Ус, цаг уур, орчны шинжилгээний газраас ирүүлсэн долоо хоногийн цаг агаарын урьдчилсан мэдээгээр 6 дугаар сарын 22-ныг хүртэл тариалангийн үндсэн бүс нутгуудад хур тундас багатай, хэт халалт болох төлөвтэй байна. Харин тариалалтын бутлалтын үе 6 дугаар сарын 15-25-ны хооронд байдаг. Энэ үеэр хэт халалт болвол чанар сайтай, арвин ургац хураан авах боломжгүй байдал үүсэх эрсдэлтэй. Тиймээс ХХАА-н сайд Р.Бурмаа үүлэнд зориудаар нөлөөлж, бороо оруулах хүсэлтийг Засгийн газарт тавьсан нь ийнхүү дэмжигдэв.