Тяньжин: Амиа алдагсдын тоо 44-д хүрчээ

Хятадын “www.shanghaidaily.com” сайтад Тяньжинд болж буй явдлыг хураангуйлан мэдээлжээ.

• Бээжингийн цагаар өчигдөр 23.30 цагт уурхайн тэслэгч болон тэсрэх бөмбөг хураасан агуулахад дэлбэрэлт болж, Тяньжин хотноо дараалласан дэлбэрэлт болжээ.

• Дэлбэрэлтийн үеэр 17 хүн амиа алдсан бол өнөөдрийн 14.00 цагийн байдлаар амиа алдагсдын тоо 44-д хүрчээ.

• Дараалласан дэлбэрэлтээс болж 548 хүн гэмтсэн бөгөөд тэднийг хотын 11 эмнэлэгт хуваарилж, анхан шатны тусламж үзүүлж байна.

• Галын голомтод ажиллаж буй 36 гал сөнөөгчөөс холбоо тасарсан болохыг Тяньжин хотын Онцгой байдлын газраас мэдээллээ.

• Ойролцоогоор 8000 гаруй автомашин дэлбэрч, дахин ашиглах боломжгүй болжээ.

• Сэтгүүлчдийг галын голомтод 10 км-ээс дотогш нэвтрэхийг хориглосон байна.

• Ослын шалтгаан одоо хүртэл тодорхойгүй байгаа бөгөөд дэлбэрэлт болсон агуулахын эздийг баривчилжээ.

• Амиа алдсан хүмүүсийн 70 хувь нь дэлбэрэлт болсон агуулахын ажилчид гэж “Синьхуа” агентлаг мэдээллээ.

• Энэхүү томоохон ослын дараа БНХАУ-ын дарга Си Зиньпин эмгэнэл илэрхийлж, Тяньжины иргэдийг эмх журамтай байхыг сануулсан байна.

• Тяньжинд тус улсын Ерөнхий сайд Ли Кэцян очихоор төлөвлөж байгаа гэж “Синьхуа” агентлаг мэдээллээ.

• Гал түймрийн улмаас Тяньжины бүх нислэгийг зогсоожээ.

• Тус хотод ажиллаж, амьдарч буй жуулчдыг аюулгүй газар байршуулж эхэлсэн хэмээн тус улсын Аялал жуучлалын яамны төв сайтад мэдээлсэн байна.

• Амиа алдсан хүмүүсийн дунд гадаадын иргэн байхгүй гэдгийг Тяньжин хотын дарга сэтгүүлчдэд мэдэгдлээ.

• Дараалласан дэлбэрэлт болон гал түймрийн улмаас 1900 орчим өрх цахилгаангүй болсон байна.

• Зарим хэвлэлд энэхүү дараалласан дэлбэрэлтийг тероррист халдлага хэмээн мэдээлж эхэлжээ.

• Бэртсэн хүмүүсийн хамгийн ахмад нь 97 настай бол бага нь гурван настай аж.

• Тус улсад үйл ажиллагаагаа явуулдаг олон улсын байгууллагууд Тяньжины иргэдэд тусламж үзүүлэхээр болсноо мэдэгджээ.

• Хятадын нэрт жүжигчин Жеки Чан өөрийн цахим хуудсаараа дамжуулан амиа алдагсдын гэр бүлд эмгэнэл илэрхийлэв.

• Тяньжинд болж буй үйл явдалтай холбогдуулан ихэнх телевиз энтертаймент нэвтрүүлгээ гаргахыг хориглосон байна.

Эх сурвалж:www.shuud.mn