Өглөө.мн Шинэ өглөө, Шинэ мэдээлэл
Өнгөрсөн амралтын өдрүүдэд Гонконгт явагдсан Ой тогтоолтын Ази тивийн аварга шалгаруулах тэмцээнд эхний өдөр л гэхэд манай баг тамирчид 19 медаль хүртэж тэргүүлж байгаа талаар бид мэдээлсэн.
Тэгвэл уг тэмцээн амралтын хоёр өдөрт амжилттай болж өндөрлөн дүнгээ гаргажээ.
Тус тэмцээнд нийт 13 улсын 119 тамирчин ой тогтоолтын 10 төрлөөр бага, өсвөр, насанд хүрэгчдийн ангилалд оюун ухаан, сэтгэн бодох чадвараараа өрсөлдсөн байна.
Манай улсыг төлөөлж Монголын Оюун Ухааны академийн 20 тамирчин багш, дасгалжуулагчийн хамт амжилттай оролцон авах боломжит 63 медалиас 14 алт, 13 мөнгө, 10 хүрэл нийт 37 медаль хүртэж нийлбэр дүнгээр Монгол улс хол зөрүүтэй тэргүүллээ.
Багийн бүрэлдэхүүнд насанд хүрэгчдийн ангилалд ОУ-ын Их Мастер Ө.Сэнгэсамдан, өсвөр насны ангилалд Их Мастер Э.Пүрэвжав, ОУ-ын Мастер А.Анударь, Өсвөрийн Дэлхийн аварга Э.Энхмөнх, Дэлхийн аваргын мөнгөн медальт З.Цэцэгзул, Б.Халиун, Н.Түвшинтөгс, М.Төгөлдөр, Б.Энхжин, Ю.Удвал, А.Номин, Б.Ариунсанаа, Б.Шижир-Эрдэнэ, Бага насны ангилалд Улсын Аварга Н.Намуундарь, Ж.Дөлгөөн, Ш.Шижир-Од, Г.Хүслэн, С.Саруул, Б.Бадам-Аюуш, Б.Оюунсанаа нар орлоо.
Тэмцээний 10 төрлийн нийлбэр оноогоор ой тогтоолтын ОУ-ын Их Мастер Ө.Сэнгэсамдан 6 алт, 2 мөнгөн медаль хүртэж Ази Тивийн аварга боллоо. Тус тэмцээнд авсан 7141 оноогоор Дэлхийн чансаанд 3000 гаруй тамирчдаас 5 дугаарт бичигдлээ.
Тэмцээний нийлбэр дүнгээр эхний 3 байр:
1. ОУ-ын Их Мастер Ө.Сэнгэсамдан (Монгол) – 7141 оноо
2. Их Мастер Э.Пүрэвжав (Монгол) – 5986 оноо
3. Их Мастер Erwin G.BALINIS (Филипин) – 5608 оноо
Өссвөр насны ангилалд нийлбэр дүнгээр эхний 3 байрыг Их Мастер Э.Пүрэвжав, Өсвөрийн дэлхийн аварга Э.Энхмөнх, Өсвөрийн дэлхийн аваргын мөнгөн медальт З.Цэцэгзул мөн бага насны ангилалд Н.Намуундарь дэд байрыг эзэллээ.
Өсвөр насны ангилалд тэмцээний нийлбэр дүнгээр эхний 3 байр:
1. Их Мастер Э.Пүрэвжав (Монгол) – 5986 оноо
2. Э.Энхмөнх (Монгол) – 5336 оноо
3. З.Цэцэгзул (Монгол) – 5135 оноо
Бага насанд нийлбэр дүнгээр эхний 3 байр:
1. Wenxuan DING – 3757 оноо /Малайз/
2. Н.Намуундарь – 3365 оноо /Монгол/
3. Zeqi CHEN – 3079 оноо /Хятад/
Тус тэмцээний өсвөр насны ангилалд Их Мастер Э.Пүрэвжав “Хоёртын тоолол” болон “30 минутын Хөзөр” төрөлд урьд өмнө манай тамирчдын эзэмшиж байсан Дэлхийн Рекордыг шинэчлэн тогтоолоо.
Мөн манай тамирчдаас Ө.Сэнгэсамдан, А.Анударь, Б.Шижир-Эрдэнэ, Э.Энхмөнх, З.Цэцэгзул, Э.Пүрэвжав нар Азийн Мастер цолны болзлыг хангалаа.
Дашрамд дурдахад Турк улсын Анкара хотод 9 сарын 5-6-нд нийт 300 хүүхдийн дунд явагдах чээж бодолт, соробан сампингийн тэмцээнд манай 6 тамирчин оролцоно.
Тамирчид маань маргааш буюу 8 сарын 25-ны 17:45 цагт эх орондоо ирнэ.
Ийн тамирчдаа гайхалтай амжилт гаргахад бэлдэж, эх орныхоо нэрийг дуурсгахад үнэтэй хувь оруулж буй багш, дасгалжуулагч Б.Баасандорж, А.Золжаргал, Монголын Ой тогтоолтын Спортын Холбооны Тэргүүн, Монголын Оюун Ухааны академийн УЗ-ийн Дарга, Х.Хатанбаатар болон тамирчдынхаа гэр бүлийнхэнд халуун баяр хүргэж, цаашдын их амжилтыг хүсье. 
