Өглөө.мн Шинэ өглөө, Шинэ мэдээлэл
Улаанбаатар хотноо “Ховд аймгийн өдрүүд” болохоор бэлтгэл ажлууд нь базаагдаж байна. Энэ үеэр Ховд аймгийн засаг дарга Б.Цэвээнравдантай цаг үеийн асуудлаар ярилцлаа.
– Сүүлийн гурван жилийн дотор 1200 гаруй айлын орон сууц ашиглалтад орсон-
– Нийслэлд зохион байгуулагдах “Ховд аймгийн өдрүүд”-ийн талаарх ерөнхий мэдээллээр ярилцлагаа эхлүүлэх үү?
– Аймгийн ИТХ-аас гарсан шийдвэрийн дагуу олон угсаатны өлгий болсон “Ховд аймгийн өдрүүд”-ийг Нийслэлд зохион байгуулагдахаар бэлтгэл ажлуудаа базааж байна. Өдөрлөг энэ сарын 10-14-ны хооронд нийтдээ 5 хоног үргэлжилнэ. Өдөрлөгөөр Ховд аймгийн биет болоод биет бус соёлын үзэсгэлэн, урлаг соёлын арга хэмжээ, “Ховдод үйлдвэрлэв” үзэсгэлэн худалдаа, “Ховд аймаг- Монгол улсын хөгжлийн баруун үүд” хэлэлцүүлэг гэсэн үндсэн дөрвөн төрлөөр зохион байгуулагдана.
Энэ өдөрлөгийн гол зорилго нь сүүлийн жилүүдэд Ховд аймагт өрнөж буй бүтээн байгуулалт, үйлдвэрлэл, урлаг соёлын хөгжлийг олон нийтэд сурталчлах цаашлаад хөрөнгө оруулагчдыг татах зорилготой юм.
– “Ховд аймаг- Монгол улсын хөгжлийн баруун үүд” хэлэлцүүлгийн хамрах хүрээллийн талаар мэдээлэл өгнө үү?
– Энэ хэлэлцүүлгээр Ховд аймгийн нийгэм эдийн засгийн өнөөгийн байдал, боломж, гарцын талаар холбогдох албаныхан санал солилцох юм. Хэлэлцүүлэгт УИХ болоод засгийн засгийн гишүүд, яамд, удирдах шатны байгууллагуудад ажиллаж буй үйлдвэржилтийн бодлого хариуцсан албаны хүмүүс оролцоно. Мөн банк санхүү, бизнесийн салбарынхан, нутгийн зөвлөлийн дарга нар оролцож, санал бодлоо илэрхийлэхээр төлөвлөсөн.
Хэлэлцүүлгийн гол зорилго нь хөрөнгө оруулалтыг татах явдал. Бид орон нутагт буй бодит боломж, нөхцөл байдлын талаар дэлгэрэнгүй танилцуулга хийнэ. Үүн дээр төрийн бодлогын хүрээнд ямар чиглэлээр дэмжих хэрэгтэй байгаа, бизнесийн салбарынхан манай аймагтай хэрхэн хамтарч ажиллаж болох зэрэг асуудлаар санал солилцох юм.
– Ховд аймгийн нийгэм, эдийн засгийн өнөөгийн байдал ямар түвшинд явж байна вэ?
– Ховд аймгийн нийгэм, эдийн засгийн байдал харьцангуй өөдрөг төсөөлөлтэй, бодит үзүүлэлттэй явж байгаа. Хэдийгээр улс орны эдийн засгийн байдал хүнд байгаа ч Ховд аймгийн ДНБ 2013 онд 29 хувиар, өнгөрсөн онд 32 хувиар өссөн. Энэ нь сүүлийн жилүүдэд тодорхой нэр бүхий хөрөнгө оруулалт, бүтээн байгуулалтууд хийгдэж байгаатай салшгүй холбоотой. Энэ хэрээр эдийн засаг эрчимтэй өсөж байгаа. Эдийн засгийн энэ эерэг үзүүлэлтэд үндэслэн, Ховд аймаг, сумдын хөгжлийг тэлэх суурь ажлуудыг нэлээд эрчимжүүллээ.
– Тухайлбал?
– Ховд хотод хоёрдугаар дулаан станц, мегастрал шугам, дулаан түгээгүүрүүдийг шинээр барьж, ашиглалтад оруулсан байгаа. Цэвэрлэх усны насосын асуудлыг шийдэж, цэвэрлэх байгууламжийнхаа хүчин чадлыг хоёр дахин нэмэгдүүлэх ажил бараг дуусах шатандаа явж байгаа.
Хотын өсөн нэмэгдэх хэрэгцээг цахилгаанаар хангах дэд станцын шугмын өргөтгөлийг хийж, хот тохижилтын шинэчилсэн төлөвлөгөөг боловсруулж дуусгасан зэрэг ажлуудыг мөн онцлон нэрлэмээр байна. Ховд хот өнөөдрийн байдлаар 40 мянган хүн амтай. Цаашид 80 мянга ба түүнээс дээш хүн ам бүхий үйлдвэрлэлийн цэгүүд хөгжих, баруун бүсийн хөгжлийн төв, таталцлын цэг, Шинжлэх ухаан, боловсрол, эрүүл мэндийн төв болон хөгжихөд шаардагдах дэд бүтцийн бүх асуудлууд нь шийдэгдсэн байгаа.
– Цаашид үйлдвэрлэл хөгжих тал дээр дэд бүтцийн асуудал бүрэн шийдэгдсэн гэлээ. Тэгвэл өнөөдрийн түвшинд үйл ажиллагаагаа явуулж буй, дөнгөж эхэлж байгаа үйлдвэрлэл эрхлэгчдээ хэрхэн дэмжиж байгаа бэ?
– Бидний зүгээс Ховд аймагт үйлдвэрлэл эрхлэхэд хамгийн ээлтэй, ногоон хөгжлийн загвар аймаг болох зорилго тавин ажиллаж байна. Энэ ч үүднээс үйлдвэрлэл эрхлэх хүсэлтэй, эрхэлж буй хувь хүн, аж ахуйн нэгжүүдэд инженерийн шугам сүлжээ нь бүрэн шийдэгдсэн газарт үйл ажиллагаа явуулах боломжоор хангахаар нээлттэй тендер зарласан. Цаашлаад төслүүдийг холбогдох газруудтай нь холбох, орон нутгийн дотоод нөөц боломжид үндэслэн дэмжих, үйлдвэрлэлээс гарсан бэлэн бүтээгдэхүүнийг зах зээлд нийлүүлэх тал дээр бодит байдлаар туслах ажлуудыг хийж байна. Тухайлбал, “Ховд аймгийн өдрүүд”-ээр манай үйлдвэрлэгчид үзэсгэлэн худалдаагаа зохион байгуулна. Энэ нь эргээд сурталчилгаа, эдийн засгийн бодит дэмжлэг болдог.
– Үйлдвэрүүд шинэ тутам үүсэн хөгжих хурд нь ямар байна?
– Өнгөрсөн гурван жилийн хугацаанд Ховд аймагт 70 гаруй Жижиг дунд үйлдвэрлэгчид шинээр үйл ажиллагаагаа явуулж эхэлсэн. Мөн бүс нутгийн чанартай томоохон үйлдвэрүүд ашиглалтад орж, Чингис бондоор зээл авсан тохиолдол ч байна. Одоо Эрдэнэбүрэнд томоохон усан цахилгаан станц, жилд 250 мянган тонн цемент үйлдвэрлэх хүчин чадал бүхий үйлдвэр, баруун бүсийн малын гаралтай түүхий эдийг боловсруулах цогцолбор үйлдвэрүүд баригдахаар ажлаа эхлүүлсэн байгаа.
– Аймгийн төв цаашид тэлж хөгжөөд ирэхээр барилгын салбараа хөгжүүлэх, орон сууцжуулах ажлууд гарч ирнэ. Энэ асуудлаа яаж шийдэх бэ?
– Аймгийн хэмжээнд сүүлийн гурван жилийн дотор 1200 гаруй айлын орон сууц ашиглалтад орсон. Энэ бол манай аймагт өмнө нь тавин жилийн хугацаанд баригдсантай тэмцэх тоо юм.
