85 настай хулгайч эмгэн

АНУ-д үнэт эдлэлийн хулгайгаар гаршсан хамгийн зартай нэгэн болох Дорис Пэйн гэдэг эмэгтэй саатуулагджээ. 85 настай энэ эмгэн Жоржи мужийн нийслэл Атланта хотын худалдааны төв дотор үйлдэл дээрээ баригдсан аж. Калифорни мужийн Лонг-Бич хотын оршин суугч эмэгтэй өнгөрөгч баасан гаригт тус дэлгүүрийн хамгаалагчийн хараанд орсон гэнэ. Үнэт эдлэлийн тасаг дотор явж байгаа нэгэн эмэгтэй халаасандаа ээмэг хийснийг хамгаалалтын ажилтан хяналтын камераар харжээ. Тэрхүү ээмэгний үнэ 690 доллар байв.

Пэйн эмгэнийг дэлгүүрээс гарахад нь саатуулсан аж. Түүнийг хулгайн хэрэгт буруутгах болно. Сэжигтнийг Фултон тойргийн хорих руу аваачжээ. Үнэт эдлэл хулгайлсных нь төлөө Пэйныг Умард Каролина мужийн цагдаагийн газар эрэн сурвалжилж байгаа билээ. Мөн тэрбээр хоёр жилийн өмнө Калифорнийн нэгэн дэлгүүрээс 40 мянган долларын үнэтэй бөгж хулгайлахыг завдсан байна. Их гарын хулгайч эмгэн Парис, Монако, Токио хотын дэлгүүрүүдээс үнэт эдлэл хулгайлж байснаа хүлээсэн удаатай.

Пэйн эдгээр гэмт хэргүүдээ тогтсон нэг дэгийн дагуу үйлддэг байсан гэнэ. Аль нэг дэлгүүрт ороод эмгэн янз бүрийн үнэт эдлэл сонирхож, өөрт нь үзүүлэхийг хүсдэг байв. Ингэхдээ алмаазан шигтгээтэй бөгжнүүдийг овоо хараандаа оруулна. Ингээд худалдагч гаргаж тавьсан үнэт эдлэлийнхээ тоонд будилах үеэр эмгэн аль нэгийг нь сэмхэн халаасалчихдаг байжээ.

Эх сурвалж www.wikimon.mn