Зика вирусын халдвараас сэргийлэхийн тулд бэлгэвч хэрэглэхийг уриаллаа

АНУ-ын Өвчнийг хянах, урьдчилан сэргийлэх төв бэлгийн замаар Зика вирусын халдвар авсан байж болзошгүй 14 хүн шинээр бүртгэгдсэн талаар мэдээллээ. Шумуулаар дамжин халдварладаг Зика вирус бэлгийн замаар халддаг нь тогтоогдсоноор дэлхийд уг вирус маш өргөн хүрээнд тархаж магадгүй байгааг албаныхан тэмдэглэж буй.

Гэхдээ хамгийн аюултай нь вирусын халдвар авсан хүмүүсийн ихэнх нь жирэмсэн эмэгтэйчүүд байгаа нь эмч мэргэжилтнүүдийг түгшээж байгаа аж. Тиймээс Өвчнийг хянаж, урьдчилан сэргийлэх төвийн мэдээлснээр Зика вирусын тархалт өндөртэй байгаа төв өмнөд америк, карибын тэнгисийн орнуудад аялах үедээ бэлгийн харилцаанд орохгүй байх, хэрэв орсон тохиолдолд бэлгэвч хэрэглэхийг уриаллаа.

Бразилд Зика вирусээр үүсгэгддэг толгой жижигрэх өвчтэй нярай хүүхдийн тоо эрс нэмэгдэж байгаа юм. Учир нь жирэмсэн эмэгтэй зика вирусын халдвар авснаар уг вирус урагт халдварлаж, толгой жижигрэх өвчтэй хүүхдийн тоо нэмэгдэх хандлагатай болж ирсэн байна.