Тойргийн хуваарилалтын бухимдал

Хүний өмнөөс ичнэ гэдэг хамгийн хэцүү юм. Улстөрчдийн тойрог мандатын хуваарилалтаас болж УИХ-ын чуулган гацлаа. АН-ынхан нь өөрсдөдөө тааруулж мандатын тоог хуваарилчихаж. Тэд цэнхэр тойрог буюу АН-ынхан сонгогдох магадлалтай тойргуудаа нэгээр нэмсэн байгаа юм. Үүнийгээ тухайн газар нутаг, хүн амын тоотой харьцуулсан хамгийн зөв хуваарилалт хэмээн тайлбарлах. Харин энэ нь мэдээж МАН-ынханд таалагдаагүй. Тэдэнд таалагдах, эс таалагдах эрх баригчдад хамаагүй учир Сонгуулийн мандатын хуваарилалтыг өөрсдийнхөөрөө баталсан.

Нэг үгээр хэлбэл, Говь-Алтай, Говьсүмбэр, Булган, Дорноговь, Дундговь, Сүхбаатар аймаг тус бүр нэг мандаттай бол Дорнод, Завхан, Өмнөговь аймаг тус бүр хоёр мандаттай байна. Харин Архангай, Баян-Өлгий, Баянхонгор, Өвөрхангай, Сэлэнгэ, Төв, Увс, Ховд, Хөвсгөл, Хэнтий, Дархан-Уул, Орхон аймаг тус бүр гурван мандаттай байхаар батлагдсан.

Харин Улаанбаатар 28 мандаттай байна. Ингэхдээ Багануур, Сүхбаатар дүүргийн сонгуулийн тойрог нэгдэж дөрвөн мандаттай, Багахангай дүүргийг Хан-Уул дүүргийн сонгуулийн 56 дугаар тойрогтоо нэгтгэж дөрвөн мандат, Налайх дүүргийг Чингэлтэй дүүргийн 63 дугаар тойрогтоо нэгтгэж дөрвөн мандат, Баянгол дүүрэг дөрвөн мандаттай байхаар болсон. Баянзүрх, Сонгинохайрхан дүүрэг тус бүр 6 мандаттай байхаар батлагдсан.

Энэ нь МАН-ынхны бухимдлыг хүргээд байгаа юм. Тойргийн хуваарилалтыг хүн амын тоо, газар нутгийн хэмжээнээс илүү тэр нутагт хэн төрсөн бэ гэдгээр нь харсан болохыг УИХ дахь АН-ын бүлгийн дарга Б.Гарамгайбаатар хэлсэн. Чингис хааны төрсөн нутаг учраас 1 мандат нэмж, 3 мандаттай болсон гэж хариулсан нь бусад хүмүүсийн хувьд инээдэм болсон юм. Ийм тайлбар хийж байгаагаас нь харахад өмнөөс нь ичих юм. Эрх баригчид нь ч тэр хүчээр тойргийн хуваарилалтыг хийх юм. Сөрөг хүчнийхэн нь ч бойкот хийж, тойргийн хуваарилалтыг өөрсдөдөө ашигтай байх талаар л ярьж байна. Ард түмэнд ашигтай хувилбар хаана байна???

Эх сурвалж:цензургүй.мн