Америк, Англи тэргүүтэй улсууд Сири дэх аллагыг санхүүжүүлж байна

 “Press TV” сайтад гарсан нийтлэлийг товчлон хүргэж байна.

 Өрнөдийн  орнууд,  тэдгээрийн хэв­лэл мэдээллүүд Сирийн эсрэг 30 сарын турш нууц, бохир дайн явуулахдаа энгийн номхон иргэдийг хоморголон хөнөөж буй тухай маш их мэдээлж, шуугиан тарьдаг байв. Гэтэл одоо эдгээр улсын Засгийн газар, хэвлэл мэдээллүүд ийм мэдээллийн талаар огтхон ч дурсахаа больжээ. Чухам яагаад ингэх болов.

Яагаад гэвэл Сирийн хэдэн мян­ган энгийн  иргэний  эсрэг гэмт хэрэг үйлдсэн бүлэглэл нь гадаадын дэмж­лэгтэй, тэдний гар хөл болсон хөлс­нийхөн бай­сан аж. Тэднийг өр­нөдийн Засгийн газрууд, хэвлэл мэдээллүүд “Ардчилсан эрх чөлөө”-ний төлөө тэмцэгч баатар болгон харуулах гэж оролддог байлаа.

Энэхүү инээдэмт жүжиг энгийн иргэдийн эсрэг хийсэн хүчирхийллийг ивээн тэтгэгч барууны Засгийн газ­руудыг төдийгүй хэвлэл мэдээллийн бүхий л салбарын үнэн мөнийг ил­чилсээр нуран унав.

Хэнээс ч хараат  бус нэрийн дор худал мэдээлэл цацаж, мөргөлдөөний эргэн тойрныг бусдад буруугаар ойл­гуулсан учраас хэвлэл мэдээллүүд ч цэргийн гэмт хэргийг  нуун дараг­дуулсан хэрэгт хамааралтай  болж бай­гаа юм. Ер нь хүн төрөлхтний эсрэг гэмт хэргийн тухай худал  хуурмагийг олонд цацахаас илүү ноцтой хүний эрхийг зөрчих гэж байх уу.

Хамгийн  сүүлчийн тохиолдол л гэ­хэд хойд Алеппо мужийн Хан аль-Асал хотод болсон хүмүүсийг хоморголон хөнөөсөн явдал билээ. Тухайн үед ихэвчлэн энгийн номхон иргэдээс бүрд­сэн 150 орчим хүнийг хайр найргүй устгасан гэж мэдээлж байсан. Тэдний ихэнх нь цаазлуулж байгаа мэт толгой руугаа шууд буудуулж амиа алджээ. Үүний хариуцлагыг “Аль-Кайда”-тай холбоотой “Фронт аль-Нусра”, “Ансар аль-Халиф” бүлэглэлүүд хүлээсэн юм.

Баттай  эх  сурвалжийн    мэ­дээлс­нээр алуурчид өөрсдийн хийсэн жиг­шүүртэй  нүглээ далдлахыг орол­дож, цогцоснуудын нүүр царайг таниг­дахын аргагүй болгож, үлдэгдлийг нь шатааж байсан гэнэ. Үүнээс хэдхэн хоногийн өмнө эдгээр бүлэглэл Хасака мужийн Макбара хотын энгийн номхон долоон иргэнийг хөнөөсөн.

Эдгээрийг үйлдсэн дайчдын ихэнх нь гадаадынхан буюу Саудын Араб, Ливи, Иордан, Турк, түүнчлэн АНУ, Их Британи, Франц, Германы иргэд байсан гэнэ.

Өнгөрсөн долоо хоногт л гэхэд Саудын Араб Сирийн ард түмнийг айл­­гаж, дуулгавартай болгохын тулд Израилиас 50 сая ам.долларын өртөгтэй хүнд зэвсэг худалдаж авчээ. АНУ, Британи, Франц улс 200 сая гаруй ам.доллар Сирид зарцуулсан. Тэдний баталж буйгаар энэ мөнгийг Сирийн сөрөг хүчнийхэнд эм бэлдмэл, хүнсний тусламж маягаар олгосон гэнэ.

Энэ бол өрнөдийн Засгийн газар, түүнчлэн Турк, Араб, Израилийн бүс нутагтаа ашиг сонирхлоо тогтоох гэ­сэн оролдлогоо далдалсан, Сири дэх геноцидыг дэмжиж буйгаа нуусан хоосон үг.

Өнгөрсөн оны тав, зургаадугаар сард Сирийн Хула, Кубейр тосгонд хү­мүүсийг үй олноор нь хөнөөсөн тухай мэдээлэл гарахад өрнөдийн хэвлэлүүд тэдгээрийн хоолойг хэрчсэн байсан тухай шуугиж байсан. Үүндээ тэд Си­рийн улсын аюулгүйн хүчнийхнийг бу­руутгаж, Ерөнхийлөгч Башар Асадыг шүүмжилж байв.

Тухайн үед АНУ-ын Төрийн нарийн бичгийн дарга Хиллари Клинтон Асадыг аллага, айдас хүйдсээр улсаа за­хирдаг хэмээн буруутгаж, түүнийг огцрохыг шаардсан өрнөдийн Засгийн газруудын бүлгийг тэргүүлж байсан юм.

 Хожим нь Хула, Кубейрт болсон үй олноор нь хөнөөсөн хэргийг өрнө­дийнхний дэмждэг гадаадын дайчиж үйлдсэн болох нь тогтоогдсон. Гэвч өрнөдийн хэвлэлүүд үүнийг мэдээ­лээгүй.

Түүнчлэн шуугиан тарьсан гарчиг бүхий бас өөр олон аллагыг суртал ухуулга хэлбэрээр гаргаж байжээ. Ту­хайлбал 2012 оны долоодугаар сард Тремст болсон алан хядах үйл ажил­лагаа, эсвэл энэ оны нэгдүгээр сард Алеппогийн их сургуульд болсон дэлбэрэлтийг дурдаж болно.

Сирийн Засгийн газар дараа нь эд­гээр аллагуудыг өрнөдийнхний дэмж­лэг авсан дайчид үйлдсэн болохыг баталсан.

 Асадын  засаглалыг  түлхэн унага­хын тулд энгийн номхон иргэдийг хайр найргүй хөнөөснөөс гадна зах, гудамж, эмнэлэг, сургуульд авто машинуудыг минажуулж дэлбэлсэн нь цөөнгүй.

Гэтэл эдгээрийг бодит үнэнээр нь мэдээлсэн “Press TV” зэрэг мэдээллийн албадыг өрнөдийн засаг захиргаа хянадаг хиймэл дагуулын сүлжээгээр цацахыг хориглох жишээтэй.

Өрнөдийн Засгийн газрууд, хэвлэл мэдээллүүд Сирид болсон хамгийн сүүлчийн аллагуудын талаар дуугүй байгаа нь сэтгүүлчдийнх нь хайнга, юмсыг анзаардаггүйтэй холбоотой бус. Харин энэ бол тэднийг Сирийн эсрэг нууц геноцидод холбоотой гэдгийг баталж байгаа аж.