Өглөө.мн Шинэ өглөө, Шинэ мэдээлэл
Тогтвортой хөгжлийн зорилгын дэд хорооны хуралдаан өнөөдөр /2016.11.15/ боллоо. Хуралдаанд УИХ-ын гишүүн, Тогтвортой хөгжлийн зорилгын дэд хорооны дарга С.Чинзориг, УИХ-ын гишүүн Ё.Баатарбилэг, Ц.Цогзолмаа, Д.Гантулга, О.Баасанхүү нар оролцлоо.
Хуралдааны эхэнд НҮБ-ын суурин зохицуулагч Биата Транкман “Тогтвортой хөгжлийн зорилгууд” сэдвээр илтгэл тавилаа.
Илтгэлд дурьдсанаар Монгол Улс цаашид хөгжье гэвэл:
-Үндэсний болон орон нутгийн түвшинд бодлогын уялдааг хангах
-Бодлогодоо тогтвортой хөгжлийн зорилттой уялдуулах
-Үр дүнгийн хяналтад шаардагдах тоо мэдээллийн олдоц, хэрэглээний ойлголтыг сайжруулах
-Зөвлөгөө, сурталчилгаа, оролцоог бэхжүүлэх шаардлагатай аж.
Мөн бодлогын болон хэрэгжилтийн босоо, хэвтээ түвшний уялдааг хангахад институцийн зохистой тогтолцоог бүрдүүлэх, төсөвт дүн шинжилгээ хийж зарлагын оновчтой зарцуулалтыг бий болгох шаардлагатай гэж НҮБ-ын суурин зохицуулагч Биата Транкман онцоллоо.
Үүний дараа Үндэсний хөгжлийн газрын Судалгаа, шинжилгээний албаны дарга А.Мөнхболд “Монгол Улсын тогтвортой хөгжлийн үзэл баримтлал 2030” сэдвээр илтгэл тавив.
Үндэсний хөгжлийн газар байгуулагдаад удаагүй байгаа. Манай байгууллага Монгол Улсын тогтвортой хөгжлийн үзэл баримтлалд нийцсэн эдийн засгийн тэргүүлэх чиглэл, салбарыг тодорхойлж, хөрөнгө оруулалтын бодлогыг зөв зохистой төлөвлөж, эдийн засгийн аюулгүй байдлыг хангах, салбарын хөгжлийн бодлогыг хүн амын нутагшилт, суурьшил, бүс нутаг, орон нутгийн хөгжлийн бодлого, хот байгуулалтын бодлоготой зөв уялдуулан экологийн тэнцвэртэй байдлыг хадгалсан хүн амын ажиллаж, амьдрах эдийн засгийн таатай орчныг бий болгож, иргэдийн амьжиргааны түвшинг дээшлүүлэхэд үйл ажиллагаагаа чиглүүлэн ажиллаж байна гэж А.Мөнхболд дурьдлаа.
Илтгэлтэй холбогдуулан гишүүд асуулт асууж, үг хэлэв. Гишүүд “Тогтвортой хөгжлийн үзэл баримтлал 2030” баримт бичгийг хэрэгжүүлэх холбогдох байгууллагууд уялдаа холбоотой ажиллахыг зөвлөлөө гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.
