“Яг түүн шиг-2” шоуны супер ялагчаар Т.Бархүү тодорлоо

Дэлхийн 39 оронд зохион байгуулагдсан “Яг түүн шиг-2 ” шоу нэвтрүүлгийг “Боловсрол” телевиз “Эндемол Шайн” группийн   албан ёсны эрхтэйгээр 2017 оны 4-р сарын 2-нээс эхэлж ийнхүү хоёр сар гаруй хугацаанд амжилттай зохион байгуулж өчигдөр супер ялагчаа тодрууллаа.

“Яг түүн шиг-2” шоуны  супер ялагчийн төлөө  “Камертон” хамтлагийн дуучин Г. Мэнд-Амар, “X-Түц” продакшны жүжигчин Т.Бархүү, төгөлдөр хуурч С.Алимаа,  аялагч, дуучин Г.Ганхүү , дуучин С.Гантогоо, дуучин Б.Халиун нар өрсөлдөж супер ялагчаар “X-Түц” продакшны жүжигчин Т.Бархүү Aerosmith хамтлагийн дуучин Стивен Тайлерийн дүрд тун чадварлагаар хувирч шүүгч, оролцогч, үзэгчдийн мессеж саналын онооны дүнгээр “Яг түүн шиг-2” шоуны супер ялагчийн эзнээр тодорлоо.

Супер ялагчийн эзнээр тодорсон Т.Бархүү:“Та нартаа маш их баярлалаа. Хэлэх үг олдоггүй юм байна.Энэ бол амьдралд тохиох ховор боломж. Ийм боломжийг олгож өгсөн Боловсрол телевизийнхэндээ баярлалаа. “Х-Түц” хамтлагийнхандаа баярлалаа. Энэ хорвоод намайг хүн болгож өгсөн ээж, аавдаа маш их баярлалаа. Аав минь тэнгэрийн орноос харж байгаа байх. Өнөөдөр энэхүү тайзан дээр намайг та нарт ийм гайхалтай үзүүлбэр үзүүлэхэд  намайг дандаа дэмжиж байсан түүнд би хайртай ч зоригтойгоор хайртай гэж тийм ч олон хэлж байгаагүй байх. Надтай хамт олон шөнө энэ нэвтрүүлгийн төлөө нойргүй хоносон Одончимэгтээ  баярлалаа хайртай шүү. Үлдсэн амьдралаа зөвхөн чамтайгаа амьдарна. Намайг дэмжиж байсан Монголчууд  та нарынхаа итгэлийг алдахгүй байх болно” гэж сэтгэгдлээ илэрхийллээ.

“Яг түүн шиг-2” шоуны  супер ялагч  Т.Бархүү 20 сая, Clarins үйлчлүүлэх 1,5 сая төгрөгний эрхийн бичиг , Britannica боть нэвтэрхий толь, Uniteliin 8888….. дугаарын эрхээр тус тус шагнагдлаа.

“Яг түүн шиг-2” шоуны супер ялагчийг тодруулах дугаарт  зочин шүүгчээр поп дива Т.Ариунаа уригдан шүүгч Н.Онон, Б.Наранзун нарын хамт ажилалаа.

Арван дугаарын турш оролцогчдыг маань тив дэлхийн оддын дүрд хувиргах   даалгаврыг ОХУ-ын тусгай нүүр хувиргалтын “FX Pro LAB” компанийн Алексей Ивченкогоор ахлуулсан багийнхан хийж гүйцэтгэлээ.

 

Г.Нараа