Өглөө.мн Шинэ өглөө, Шинэ мэдээлэл
УИХ-ын ээлжит чуулган завсарлаж өнгөрсөн хугацаанд гишүүд амралтын байдалтай байсаар байна. Хаврын чуулганы сүүлчээр УИХ-ын 76 дахь гишүүнээр сонгогдон тангараг өргөсөн Д.Сумъяабазар саяхнаас хөдөлж эхэлжээ.
Тэрбээр Сонгинохайрхан дүүргээс дахин сонгуулиар ялалт байгуулан парламент дахь намынхаа суудлыг нэгээр нэмсэн. Гэсэн ч Д.Сумъяабазар гишүүнийг тангараг өргөөд удаагүй байхад чуулган завсарласан болохоор мань эрхмийн хаана юу хийж яваа нь тодорхойгүй, нам гүмхэн байсан.
Тэгвэл өчигдрөөс тойргийнхоо сонгогчидтой уулзалт зохион байгуулж, иргэдтэйгээ санал бодлоо солилцжээ. Тэрбээр уулзалтаа дүүргийнхээ 12 дугаар сургуулийн спорт зааланд зохион байгуулсан байна.
Түүнчлэн тус тойрогт АН-аас нэр дэвшин, ялалт байгуулсан Л.Эрдэнэчимэг гишүүн ч дээрх сургуулийн зааланд сонгогчидтойгоо уулзалт зохион байгуулсан нь их хачирхалтай тохиолдол боллоо хэмээн тойргийн иргэд шивэр авир хийж байсан аж.
