Нийслэлийн МАН хамгийн эхэнд хариуцлага хүлээх ёстой

УИХ-ын 65 суудал, бүхий л аймагт өөрийн эрх мэдлийг хэрэгжүүлэх бүрэн боломжийг ард түмэн МАН-д өгсөн. Гэвч тэд сонгогч түмнийхээ итгэлийг сонгогдсныхоо маргаашаас л алдаж эхэлсэн юм.

Үүний хариулт бол саяхан болж өнгөрсөн Ерөнхийлөгчийн сонгууль юм. МАН үндсэндээ нэг сонгуульд хоёр ч удаа ялагдчихлаа. Буруу нь нэр дэвшигч гэхээсээ өмнөх ялалтандаа бялуурсан аймаг, хот, дүүргийн удирдлагуудад л бий. Тэр тусмаа гутамшигтайгаар ялагдал хүлээсэн Нийслэлийнхэнд алдаа дутагдал их бий.

Хоёр л дүүрэгт ялж, бусад дүүргүүдэд үнэмлэхүй ялагдал хүлээлээ. Энэ бол өнгөрсөн нэг жилийн хугацаанд Улаанбаатар хотын удирдлагууд хэрхэн ажилласан бэ гэдэгт өгч буй үнэлгээ юм.

Э.Бат-Үүлийг муу ажилласан учраас багаар нь сольж, цоо шинэ багаар Улаанбаатар хотыг удирдуулахыг нийслэлчүүд хүссэн. Гэвч Э.Бат-Үүлээс ч муу удирдлага хотод ирж. Тэд ажлаа мэдэхгүй, үрэлгэн, сулбагар … гээд тоочвол олон дутагдал бий.

Гэвч үүнийгээ мэдрэхгүйгээр Ерөнхийлөгчийн сонгуульд орж, нэр дэвшигчээ л “муухай” харагдууллаа даа.

Ичих ч үгүй хотын төвд газар ухаж, түүнийгээ өмнөх удирдлагуудад тохож, төсвийн мөнгөөр шоу, цэнгээн зохион байгуулж, алдаагаа бас л бусдад тохож яваа эдгээр хүмүүс үнэхээр бүтэхгүй. Тиймээс цаг алдаад юу хийх вэ. Одоо бууцгаа. Чаддаг нь ажлаа хийг.

Улс төр, нам засаг, үүрэг хариуцлагаа ухамсарламаар л байна даа. Залчихсан шавар бурхад шиг л байх юм.