Айл гэрт зовлон дууддаг Феншуйгийн байрлалууд

Та гэрийн тавилгаа буруу байрлуулж, тохижуулснаас болж, гэрт сөрөг энерги хуримтлагдаж, азгүй явдлууд ар араасаа тохиолдох нь бий. Харин бид өнөөдөр та бүхэндээ анхааруулга болгох үүднээс, гэрт азгүйтэл авчирдаг Феншуйгийн буруу байрлалуудыг танилцуулж, багахан зөвлөгөөг хүргэхээр бэлтгэлээ.

Ороо хаалгатай ойр байрлуулах

Орны толгой хаалгатай хэт ойр байж болохгүй. Энэ нь таны сайн сайхан энергийг хаалгаар хөөн гаргаж, эсрэгээрээ сөрөг энергийг дууддаг гэж үздэг байна. Тиймээс ороо хаана байрлуулах вэ? гэдгээ сайтар бодож, хананд тулгаж тавиарай.

Өөд өөдөөсөө харсан толь

Өөд өөдөөсөө байрлалтай толь нь гэрт сөрөг энергийг дууддаг. Мөн толийг нөгөө ертөнцийн хаалга хэмээдэг тул өөд өөдөөс харсан толь нь сүнс, чөтгөрийг гэрт авчирдаг гэж үздэг байна. Тиймээс толио хаана байрлуулахаа сайтар бодож байхад буруудахгүй.

Суултуурын тагийг онгорхой орхих

Суултуурын тагийг онгорхой орхиж болохгүй. Энэ нь сөрөг энерги, муу муухай бүхнийг авчирж, айл гэрт хэрүүл тэмцлийг дууддаг байна.

Гэр эсвэл цэцэрлэгт хатсан цэцэг байх

Гэрт үхэж, гандсан цэцэг байх нь хэрүүл тэмцэл, өвчин эмгэгийг авчирдаг хэмээн үздэг. Та цэцгээ тогтмол усалж, арчилж байгаарай. Ингэснээр агаарыг цэвэршүүлж, гэрийн өнгө төрхийг чимэхээс гадна эерэг энергийг хуримтлуулах болно.

Хогоо гаргаж хаяхгүй байх

Гэртээ байгаа бүх хогоо гаргаж хаях хэрэгтэй. Бохир заваан, дүүрэн хогтой айлын энерги сөрөг болон хувирч, аз жаргал гээчийг амтлах хувьгүй болдог байна. Тиймээс гэрээ цэвэрлэж, хэрэглэхээ больсон хогоо гаргаж хаях хэрэгтэй.

Ханандаа ганцаардмал зураг өлгөх

Уйтгар гунигт автуулахуйц ганцаардмал зургийг ханандаа өлгөж болохгүй. Үүний оронд үзэсгэлэнт байгаль, өнгө алаглам цэцэгсийн эерэг энергитэй зургийг өлгөөрэй.

Гэрээ өөр хүнээр тохижуулуулах

Танд сайн сайхан энерги бэлэглэх зүйлсийг гэртээ байрлуулж, тохижуулаарай. Харин эсрэгээрээ хэн нэгний тохижуулсан, хүйтэн энергитэй гэрт байх нь айл гэрт азгүйтлийг авчирдаг.

Унтлагын өрөөндөө зурагт байрлуулах

Унтлагын өрөөндөө зурагт тавих нь хосуудын харилцаанд сэв суулгах аюултай байдаг. Мөн энэ нь дархлааны системийг муутгадаг тул аль болох унтлагын өрөөнөөс хол байлгаарай.