Жижиг Тавантолгой ноогдол ашиг тараагаад эхэллээ, Том нь яав?

Монголын хөрөнгийн биржид бүртгэлтэй Тавантолгой ХК-ийн Төлөөлөн удирдах зөвлөл хуралдаж, 2017 онд 141 тэрбум төгрөгийн цэвэр ашигтай ажилласан тул компанийн хувьцаа эзэмшигчиддээ ноогдол ашиг тараах шийдвэрийг гаргалаа.

ТУЗ-ын хурлаар нэгж хувьцаа тутамд 2410 төгрөгийн ашиг өгөхөөр шийдвэрлэсэн. Мөн ажилчиддаа зургаан сарын цалинтай тэнцэх мөнгөн урамшуулал олгох юм байна.

Тэд 2016 онд нийт ашгийнхаа 85 хувийг буюу 45.6 тэрбум төгрөгийг ноогдол ашиг болгон тарааж байжээ.

Үнэхээр гайхалтай. Ашгийг олсон шиг олоод хувьцаа эзэмшигчиддээ ногдол ашгийг тараасан шиг тарааж байна. Гайхалтай биш гэж үү.

Гэтэл бидний 1072 ширхэг хувьцаа эзэмшдэг “Эрдэнэс Тавантолгой” ХК-аас сураг алга. Манай дарга нар бол энэ компаниас хангалттай идэж, хувь хишиг хүртэж байгаа. Харин иргэддээ ногдол ашиг тараах гэхээр л таг гацчихаад байгааг нь ойлгохгүй юм. Адилхан компани адилхан ашиг олж л байгаа. Харин төр л хутгалдчихаар иргэдэд ирэх ногдол ашиг замдаа замхарчихаад байх байна. Улс төрчид гэж ханаж цаддаггүй хүмүүс байх юм даа.