Өглөө.мн Шинэ өглөө, Шинэ мэдээлэл
Бүгд Найрамдах Ардчилсан Солонгос Ард Улс, Америкийн Нэгдсэн Улсын тэргүүн нарын дээд түвшний түүхэн уулзалт 2018 оны зургадугаар сарын 12-ны өдөр Сингапурт амжилттай болж, талууд Хамтарсан мэдэгдэлд гарын үсэг зурсан юм.
Үүнтэй холбогдуулан Монгол Улсын Ерөнхийлөгч Х.Баттулга өнөөдөр БНАСАУ-ын Хөдөлмөрийн намын дарга, БНАСАУ-ын Төрийн зөвлөлийн дарга эрхэмсэг ноён Ким Жон Ун, АНУ-ын Ерөнхийлөгч Дональд Трамп нарт баяр хүргэсэн илгээлт явууллаа.
Хойд Солонгосын удирдагч Ким Жон Унд явуулсан илгээлт
“Бүгд Найрамдах Ардчилсан Солонгос Ард Улс, Америкийн Нэгдсэн Улсын тэргүүн нарын дээд түвшний түүхэн уулзалт 2018 оны 6 дугаар сарын 12-ны өдөр Сингапурт амжилттай болж, талууд Хамтарсан мэдэгдэлд гарын үсэг зурсанд Эрхэмсэг ноён дарга Танд Монголын ард түмний нэрийн өмнөөс болон хувиасаа чин сэтгэлийн баяр хүргэе.
Энэ уулзалт нь Бүгд Найрамдах Ардчилсан Солонгос Ард Улс, Америкийн Нэгдсэн Улсын харилцаанд төдийгүй Зүүн хойд Ази, Солонгосын хойгт түүхийн шинэ эрин үеийг нээсэн уулзалт боллоо гэж Монгол Улс үзэж, талархан хүлээн авч байна. Хоёр тал яриа хэлэлцээг амжилтад хүргэхийн тулд ихээхэн хүч чармайлт, хөдөлмөр, тэвчээр гаргаж, энэхүү чухал үр дүнд хүрч чадлаа.
Энэхүү түүхэн уулзалтаар талууд Солонгосын хойгийг цөмийн зэвсгээс бүрэн ангижруулж, бат бэх энх тайвныг тогтоох, Бүгд Найрамдах Ардчилсан Солонгос Ард Улс, Америкийн Нэгдсэн Улсын хооронд харилцааг хэвийн болгох талаар хамтран ажиллахаар тохирсон нь Солонгосын хойгт төдийгүй Зүүн хойд Азийн бүс нутагт, улмаар дэлхийн энх тайван, аюулгүй байдалд томоохон өөрчлөлт дэвшлийг авчирна гэдэгт эргэлзэхгүй байна.
Монгол Улс Бүгд Найрамдах Ардчилсан Солонгос Ард Улстай тогтоосон уламжлалт найрсаг харилцаагаа улам өргөжүүлэн хөгжүүлэхийн төлөө байна. Бид Зүүн хойд Ази, Солонгосын хойгт энх тайван, тогтвортой байдлыг тогтооход чиглэсэн холбогдох улсуудын яриа хэлэлцээг дэмжиж, хамтран ажиллахад бэлэн байна.
Эрхэмсэг ноён дарга Танд улс орноо хөгжүүлэх, Солонгосын хойгт эв эеийг эрхэмлэсэн, хамтын хөгжлийг цогцлоох их үйлсэд тань амжилт хүсье.
Танд эрүүл энх, сайн сайхныг, найрсаг Солонгосын ард түмэнд хөгжил цэцэглэлтийг ерөөе” гэжээ.
АНУ-ын Ерөнхийлөгч Дональд Трампад явуулсан илгээлт
“Ноён Ерөнхийлөгч өө,
Юуны өмнө АНУ, БНАСАУ-ын удирдлагуудын Сингапур Улсад хийсэн түүхэн уулзалт амжилттай болж өндөрлөсөнд чин сэтгэлийн баяр хүргэж байгааг минь хүлээн авна уу.
Энэхүү уулзалтын дүнд хоёр тал Хамтарсан мэдэгдэлд гарын үсэг зурж, Солонгосын хойгийг цөмийн зэвсгээс ангид байлгах чин эрмэлзлээ баталгаажуулсан нь энэ бүс нутагт энхтайван, аюулгүй, тогтвортой байдал тогтож, хөгжил цэцэглэл авчирах бодит эхлэлийг тавилаа гэж үзэж байна.
Та надад 2018 оны 2 дугаар сард ирүүлсэн захидалдаа, АНУ нь Солонгосын хойгийг цөмийн зэвсгээс ангид байлгахын төлөө тууштай байгаагаа тэмдэглэж, энэ зорилгод хүрэхийн тулд дэлхийн улс орнуудын Засгийн газрын хариуцлага, тууштай байдал чухал болохыг тэмдэглэж байсан билээ.
Монгол Улс нь өөрийн оршин буй бүс нутгийнхаа тогтвортой байдал, хөгжил цэцэглэлийн төлөө тууштай зогсч, энэ эрхэм үйлсэд хувь нэмрээ оруулж ирснийг тэмдэглэхийн сацуу Солонгосын хойгийг цөмийн зэвсгээс ангид байлгах үйл явц хурдацтайгаар эхэлж байна хэмээн Таны хэлсэнтэй санал нэг байна. Монгол Улс цаашид ч энэ үйл явцын нэг хэсэг байж, хамтран ажиллах эрмэлзэл дүүрэн байна.
Энэ ялдамд Эрхэм хүндэт Ерөнхийлөгч Танд дахин баяр хүргэж, сайн сайхныг ерөөе” гэжээ.
