Өглөө.мн Шинэ өглөө, Шинэ мэдээлэл
Өнөөдөр Ардчилсан намын төв байранд АН-аас тодорхой нэг сэдвийн дор сэтгүүлчидтэй уулздаг 4:11 уулзалт болж өндөрлөлөө. Энэ удаагийн уулзалтын сэдэв нь 2012 оны УИХ-ын сонгуулийн 15-р тойрог буюу Увс аймгийн сонгуулийн тойрогт гарсан маргааны талаар байв.
Энэ талаар АН-ын генсек Ц.Оюундарь, Увс аймагт АН-аас нэр дэвшин өрсөлдсөн Т.Мэндсайхан, Д.Нямхүү нар танилцуулсан юм. Тэдний мэдээлэлж буйгаар “2012 оны УИХ-ын сонгуульд Увс аймагт МАН-аас нэр дэвшиж, ялалт байгуулсан Ч.Хүрэлбаатар, Б.Чойжилсүрэн нарын туслах, сонгуулийн кампанит ажлын хүмүүс сонгогчдод мөнгө тараасан /Увс аймгийн Өмнөговь суманд оюутнуудад мөнгө тараасан, Улаангом суманд айлд орж мөнгө тараасан, Тариалан суманд мөнгө тараасан/ болох нь нотлогдсон улмаар хэрэгт холбоотой долоо хүн шүүхээс ял авч шийтгүүлсэн байгаа аж.
Тиймээс бүтэн нэг жилийн турш үргэлжилсэн эл маргааныг Сонгуулийн ерөнхий хороо /СЕХ/ эцэслэн шийдэх ёстой гэсэн шийдвэрийг шүүхээс гаргасан байна. Мөн АН-аас Увс аймагт нэр дэвшсэн Т.Мэндсайхан, Д.Нямхүү нар СЕХ-нд есдүгээр сарын 13-нд гомдол гаргасан бөгөөд СЕХ нэг сарын хугацаанд буюу аравдугаар сарын 13-ны дотор дээрх асуудлыг шийдвэрлэх хуулийн заалттай тул нэр дэвшигчид дээрхи хугацааг болтол хүлээж байгаа юм байна.
СЕХ-ноос Тойргийн хорооны холбогдох тогтоолыг хүчингүй болгох, УИХ-ын сонгуулийн тухай хуулийн 35.34-т заасны дагуу УИХ-ын гишүүний түр үнэмлэхийг хүчингүй болгох, санал хураалтын дүнг дахин гаргаж, УИХ-ын гишүүнээр сонгогчдын нэрийг шинээр өргөн барих боломжтой юм байна. Тодруулбал, Увс аймагт МАН-аас нэр дэвшигчдийн мандатыг хүчингүйд тооцож, хамгийн өндөр санал авсан дараагийн нэр дэвшигчдийг УИХ-д өргөн мэдүүлэх ёстой аж.
Л.Бадрах
