Өглөө.мн Шинэ өглөө, Шинэ мэдээлэл
УИХ-ын нэр бүхий гишүүд бүрэн эрхээсээ түдгэлзэж, Жижиг дунд үйлдвэрийг хөгжүүлэх сангаас зээл авсан эсэхээ шалгуулахаа мэдэгдэж мэдээлэл хийлээ.
УИХ-ын гишүүн Ж.БатЭрдэнэ“Иргэдэд очих, ядуурлыг бууруулах байсан мөнгийг авсан ёс зүйгүй үйл ажиллагаа дарагдах бүдгэрэх хандлагатай байна. Хууль эрх зүйн үндэслэлээр шалгах зүйл байгаа. Гэхдээ хуулийн байгууллагаар явахгүй байна. Тиймээс УИХ-ын 22 гаруй гишүүн гарын үсэг зурж, шударга бус явдалтай эвлэрэхгүй байхын тулд бүрэн эрхээсээ түр татгалзаад шалгуулахад бэлэн байна. Бусдадаа зөв жишгийг харуулъя. ЖДҮ-тэй холбоогүй гэдгээ хуулиар тогтоолгоё. Сүүлийн үед ард түмэн гэдэг асуудлыг битгий хэлээч гэсэн яриа гарсан байна лээ. Харин ч ярих ёстой шүү. Ард түмний боломжийг хулгайлсан хүмүүст тэгж битгий яриарай гэж хэлэх ёстой. Хууль зүйн сайд Ц.Нямдорж чуулганы хуралдааны үеэр хэлсэн. ЖДҮ-тэй холбоотой асуудал УИХ-д оруулж ирвэл хатуу хандана гэж хэлсэн” гэв.
Харин УИХ-ын дэд дарга Л.Энх-Амгалан “Ерөнхий прокурор шударга ёс энэ танхимаас эхэлнэ гэж хэлсэн. Бидний хувьд УИХ-ын гишүүний халдашгүй эрхээсээ татгалзаад шалгуулахад бэлэн байна. УИХ-ын манлайлал үзүүлж ибайгаа юм. Халдашгүй эрх гэсэн хамгаалалтад байж болохгүй. Тийм учраас хууль хяналтын байгууллагад шалгах боломжийг нь олгоё. УИХ-ын Ёс зүйн дэд хороог хуралдуулах ёстой. ЖДҮ-ийн асуудлаар нэр бүхий гишүүд Түр хороо байгуулах асуудалд чуулганаар батлагдах ёстой. Хариулт нэхсэн анхаарлын төвд байгаа хэрэг, асуудлыг шийдвэрлээд явах ёстой” гэлээ.
