Өглөө.мн Шинэ өглөө, Шинэ мэдээлэл
Шинээр томилогдсон Монгол Улсын Засгийн газрын гишүүн, Барилга, хот байгуулалтын сайд Б.Мөнхбаатар өчигдөр /2020.07.08/ УИХ-ын гишүүн, Барилга, хот байгуулалтын сайд асан Х.Баделханаас тамгаа хүлээн авч үүрэгт ажилдаа орлоо.
УИХ-ын гишүүн, Засгийн гишүүн, Засгийн газрын хэрэг эрхлэх газрын дарга Л.Оюун-Эрдэнэ, Монгол Улсын Үндсэн хуулийн Гучин есдүгээр зүйлийн 4 дэх хэсэг, Монгол Улсын Засгийн газрын тухай хуулийн 21 дүгээр зүйлийн 1 дэх хэсэг, 23 дугаар зүйлийн 1 дэх хэсгийн 2 дахь заалтыг тус тус үндэслэн Монгол Улсын Засгийн газрын гишүүн-Барилга, хот байгуулалтын сайдаар Бэгзжавын Мөнхбаатарыг томилох тухай Монгол Улсын Ерөнхий сайдын захирамжийг танилцуулав.
Ажлаа хүлээн авсан Барилга, хот байгуулалтын сайд Б.Мөнхбаатар ирэх 4 жилийн хугацаанд Засгийн газраас дэвшүүлсэн мөрийн хөтөлбөрийг хэрэгжүүлэх, барилгын салбарыг шинэ шатанд гаргахад онцгойлон анхаарч ажиллахаа илэрхийлсэн юм.
Энэ үеэр Барилга, хот байгуулалтын яамны удирдлагууд ажил хүлээлцэхэд байлцав.
