Өглөө.мн Шинэ өглөө, Шинэ мэдээлэл
Найруулагч Т.Алтантуяа, В. Агар нар хамтран Төрийн шагналт, зохиолч Д.Норовын туужаас сэдэвлэн “Хөх тавилан” уран сайхны кино бүтээжээ.
Тус киноны гол дүрд мисс, жүжигчин А.Баярцэцэг тогложээ. Тэрбээр кинонд Бадамцэцэг бүсгүйн эгэл амьдралын сонирхолтой түүхийг өгүүлэх аж.
Тэгвэл киноны “Гоолингоо” дууг Монгол Улсын Соёлын тэргүүний ажилтан, дуучин Д. Отгонжаргал дуулжээ.
Мисс, жүжигчин А. Баярцэцэг манай Өглөө.мн сайтад ярилцлага өгөх үедээ “Хөх тавилан” киноныхоо талаар ярихдаа “Зохиолын хувьд үнэхээр гайхалтай, хүний дотоод сэтгэлийг хөндөхүйц. Үүнээс гадна кино зураг авалтыг ээж, аавын минь төрсөн нутаг болох Говь-Алтай аймагт хийсэн. Мөн уран бүтээлчдийн багт гавьяат жүжигчин А.Гүрсэд, Ш.Дэлгэржаргал гээд Монголын кино урлагийн мундаг ахмад уран бүтээлчдээс гадна УДЭТ-ын жүжигчин С.Болд-Эрдэнэ, залуу жүжигчин Б.Шинэбаяр зэрэг чадварлаг уран бүтээлчидтэй хамтарч ажилласандаа баяртай байна” хэмээн ярьсан юм.
Ташрамд дурьдахад “Хөх Тавилан” уран сайхны киноны гол дүрд тоглосон жүжигчин, мисс А.Баярцэцэг 2019 оны арваннэгдүгээр сарын 20-24-ны өдрүүдэд Италийн Флоренц хотод зохион байгуулагдсан 41 дэх удаагийн Олон Улсын Эмэгтэй кино уран бүтээлчдийн наадмаас “Шилдэг жүжигчин” шагналыг хүртжээ.
