Өглөө.мн Шинэ өглөө, Шинэ мэдээлэл
Шадар сайд, УОК-ын дарга С.Амарсайхан байгалийн гамшигт үзэгдэлд нэрвэгдэн эрдэнэт хүний амь нас эрстэж, иргэд малчдад эд малын хохирол учирсан Дундговь аймгийн нөхцөл байдлын талаарх мэдээлэл солилцохоор аймгийн Онцгой комиссын гишүүдтэй онлайнаар холбогдлоо.
Тус аймагт өчигдөр буюу 3 дугаар сарын 14-ний өдрөөс эхлэн 10-15 цагийн турш үргэлжилсэн, үзэгдэх орчин хязгаарлагдсан цаг агаарын гамшигт үзэгдэл, шороон шуурганаас болж, 468 иргэн сураггүй алга болсон дуудлага мэдээлэл аймгийн Онцгой комисст ирж, комиссоос 578 ажилтан албан хаагч 186 техник тусламжтайгаар аврах, эрэн хайх ажиллагааг хэрэгжүүлсэн байна.
Онцгой комиссоос шуурхай арга хэмжээг зохион байгуулж ажилласны үр дүнд өчигдрийн 15:00 цагийн байдлаар 459 иргэнийг эсэн мэнд олсон байна. Харамсалтай нь 9 хүний амь эрсэджээ.
Хүчтэй шороон шуурга 34-40 м/секунт хүртэлх хурдтай үргэлжилж, 1.6 сая мал салхинд уруудаж, 69 барилга, объектын дээвэр хууларч, 30 автомашины шил хагарч, 587 хашаа хороо унаж, 92 гэр нурж, 9 иргэн амь насаа алдсан харамсалтай хэрэг болжээ.
Аймгийн хэмжээнд хохирлын үнэлгээг гаргаж байгаа бөгөөд сумдад шаардлагатай тусламжийн баг ажиллуулж, гамшигт өртсөн айл өрхүүдэд тусламж үйлчилгээг үзүүлж эхэлсэн тухай мэдээллийг АОК-оос Шадар сайдад уламжлав.
Гамшигт өртөж амь эрсэдсэн малчдын ар гэрийнхэнд Шадар сайд гүн эмгэнэл илэрхийлээд, УОК, АОК-аас цаг уурын аюулт үзэгдлийн талаарх сэрэмжлүүлэг мэдээллийг иргэд малчдад урьдчилсан сануулж, хүргэсээр байтал золгүй явдал тохиолдож байгааг АОК анхааралдаа авч, цаашид эрсдэлтэй бүс нутагт хаваржиж байгаа малчдын судалгааг нэн яаралтай гаргаж, эрсдэлээс урьдчилан сэргийлэх ажлыг хэрэгжүүлж ажиллахыг АОК-т үүрэг болгов.
Мөн аймгийн хэмжээнд хохирлын хэмжээг бодитой гаргах, шаардлагатай тусламж үйлчилгээний хүсэлтийг ирүүлэхийг аймгийн Онцгой комисст даалгав.
Цаг агаарын гамшигт үзэгдэл дахин давтагдаж болзошгүй тул бэлэн байдлыг хангаж, сэрэмжлүүлэг мэдээллийг иргэд, малчдад бүх хэлбэрээр түгээх, Улсын онцгой комисст цаг тухай бүрийн мэдээллийг өгч ажиллахыг уламжлаад, аймгийн хэмжээнд ариутгал халдваргүйжүүлэлтийн ажлыг сайтар хийхийг чиглэл болгов.
