Хууль зүйн байнгын хорооны даргаар УИХ-ын гишүүн Л.Мөнхбаатарыг сонгохыг дэмжлээ

УИХ-ын Хууль зүйн байнгын хорооны өнөөдрийн /2022.08.30/ хуралдаанаар Байнгын хорооны даргыг сонгох тухай асуудлыг хэлэлцлээ.

Байнгын хорооны дарга С.Бямбацогт, Монгол Улсын Их Хурлын тухай хуулийн 26.3-т “Байнгын хороог УИХ-аас нэг жилийн хугацаагаар сонгогдсон дарга тэргүүлнэ”, 26.4-т “Байнгын хорооны даргыг УИХ-д сонгогдон ажилласан туршлагыг нь харгалзан тухайн Байнгын хорооны гишүүдээс сонгох бөгөөд түүнийг улируулан сонгож болно” гэж заасан байгаа. 

Монгол Улсын Их Хурлын чуулганы хуралдааны дэгийн тухай хуулийн 27.1-д “Байнгын хорооны даргад Байнгын хорооны гишүүдийн дотроос олонхын саналаар нэр дэвшүүлнэ” гэж заасан гэдгийг дурдлаа.

УИХ дахь МАН-ын бүлгээс УИХ-ын гишүүн Л.Мөнхбаатарын нэрийг дэвшүүлж байгааг бүлгийн дарга Д.Тогтохсүрэн танилцуулав.

Тэрбээр, Л.Мөнхбаатар МУИС-ийн Хууль зүйн дээд сургууль, “Отгонтэнгэр” их сургуульд суралцан эрх зүйч бакалавр, хууль зүйн магистрын зэрэг хамгаалсан. 2015 онд МУИС-д хууль зүйн ухааны докторын зэрэг хамгаалсан.

Хууль зүйн яамны эрх зүйн шинэтгэлийн стратегийн нэгдсэн бодлого, төлөвлөлтийн газарт мэргэжилтэн, Хууль зүй, дотоод хэргийн яамны Гэмт хэргээс урьдчилан сэргийлэх ажлыг зохицуулах зөвлөлийн мэргэжилтэн, ахлах мэргэжилтэн, тус яамны Мэдээллийн шинжилгээ, үнэлгээний газрын дарга, Иргэний бүртгэл мэдээллийн улсын төвийн дарга, Ерөнхий сайдын зөвлөх, МАН-ын даргын зөвлөх, “Хөвсгөл хөгжил” сангийн тэргүүнээр ажиллаж байгаад 2016 оноос өнөөг хүртэл УИХ-ын гишүүнээр сонгогдон ажиллаж байна.

Л.Мөнхбаатар гишүүний ажлын туршлага, хууль зүйн салбарт ажилласан байдал зэргийг харгалзан үзэж УИХ дахь олонхын бүлэг буюу МАН-ын бүлгээс Хууль зүйн байнгын хорооны даргад нэрийг нь дэвшүүлж байна гэлээ.

Нэр дэвшигчээс асуулт асуух гишүүн гараагүй бөгөөд УИХ-ын гишүүн Х.Нямбаатар, ХЗДХЯ-наас өргөн мэдүүлсэн хуулийн төслүүдийг цаг алдалгүй хэлэлцэн шийдвэрлэхэд анхаарч ажиллахыг хүссэн.

Ингээд Хууль зүйн байнгын хорооны даргаар УИХ-ын гишүүн Л.Мөнхбаатарыг сонгохыг дэмжье гэсэн томьёоллоор санал хураалт явуулахад хуралдаанд оролцсон гишүүд 100 хувь дэмжлээ.