Өглөө.мн Шинэ өглөө, Шинэ мэдээлэл
Улсын Их Хурлын намрын ээлжит чуулганы өнөөдрийн хуралдаанаар Засгийн газраас 2023 оны есдүгээр сарын 29-ний өдөр өргөн мэдүүлсэн Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэж байна.
Энэ үеэр УИХ-ын гишүүн Д.Тогтохсүрэн нефтийн бүтээгдэхүүний талаар УУХҮ-ийн сайд Ж.Ганбаатараас асуулаа.
УУХҮ-ийн сайд Ж.Ганбаатар “Дизель түлшний үнэ 200 төгрөгөөр өссөн. ОХУ-ын Засгийн газрын тогтоолоос болж дизель түлшний хомсдол үүссэн. Үүнийг далимдуулж шатахууны үнэ өсгөсөн асуудал байгаа.
Дизель түлшний үнэ энэ оны арваннэгдүгээр сараас бууж эхэлнэ. Нефтийн бүтээгдэхүүний үнэ Сингапур, Санкт-Петербургийн бирж дээр бууж байгаа. Тийм учраас хамаагүй нөөцөлж болохгүй.
Манай улс БНХАУ-аас АИ-92 авто бензин, Дизель түлш аваад дөрвөн сар болж байна. БНХАУ-ын шатахуун үнэтэй, дамжуулан ачдаг учир ОХУ-тай өрсөлдөж чадахгүй байна. Гэхдээ томоохон уурхайнууд Евро 5 ангиллын Дизель түлшээ урд хөршөөс авч байгаа. БНХАУ нефтийн бүтээгдэхүүний экспортоо квотоор гаргадаг учир тогтворжихгүй байна”гэж хариулав.
