Өглөө.мн Шинэ өглөө, Шинэ мэдээлэл
Нүүрсний хэргийг хянан шалгах түр хороо өнөөдөр /2023.11.27/ хуралдаж, нотлох баримтыг шинжлэн судлах нээлттэй сонсголын товыг тогтоолоо.
Хуралдаанаар хэлэлцсэн асуудлын талаар ХЗДХ-ийн сайд, Хянан шалгах түр хорооны дарга Б.Энхбаяр мэдээлэл хийлээ.
Тэрбээр “Нүүрсний сонсголыг хоёр үе шаттайгаар зохион байгуулна. Эхний үе шат 12-р сарын 04-08, хоёр дахь үе шат 12-р сарын 18-22-ны өдрүүдэд болно. Сонсголд 175 иргэн гэрчээр оролцоно.
Тухайлбал, УИХ-ын гишүүн асан Д.Бат-Эрдэнэ, УИХ-ын гишүүн асан Р.Амаржаргал, УИХ-ын гишүүн Ш.Адьшаа, Ерөнхийлөгч асан Ц.Элбэгдорж, Ерөнхий прокурор асан М.Энх-Амгалан, Д.Дорлигжав, “Эрдэнэс таван толгой” ХК-ийн гүйцэтгэх захирал асан Б.Ганхуяг, Ерөнхий аудитор асан А.Зангад, Д.Хүрэлбаатар, Ерөнхий аудитор Д.Занданбат нар гэрчээр оролцоно ”гэв.
