УИХ-ын дарга Г.Занданшатар гадаадын иргэнд 100 жилээр газар эзэмшүүлэх заалтыг хүчингүй болгох хуулийн төсөл боловсруулж ЗГ-т хүргүүллээ

2024 оны 01 дүгээр сарын 23-ны өдөр иргэн Н. Номун-Эрдэнийн “D-Parliament” цахим системд санаачилсан “Газрыг гадаадын иргэн 100 жилээр ашиглах, эзэмшихийг цуцлах” өргөдлийг 100.117 иргэн дэмжиж, санал өгсөн байдаг.

Үүнтэй холбогдуулан энэ сарын 5-ны өдөр УИХ-ын дарга Г.Занданшатар “2013 онд батлагдсан “Газрыг гадаадын иргэн 100 жилээр ашиглах, эзэмшүүлэх тухай” тус хуулийн заалтыг хүчингүй болгох асуудлыг УИХ-ын хаврын чуулганаар хэлэлцэн шийдвэрлэнэ” гэж мэдэгдсэн.

Тэгвэл өнөөдөр УИХ-ын дарга Г.Занданшатар 2013 онд батлагдсан Хөрөнгө оруулалтын тухай хуульд заасан “Гадаадын иргэнд 100 жилээр газар эзэмшүүлэх” заалтыг хүчингүй болгох хуулийн төсөл боловсруулж, Засгийн газарт санал авахаар хүргүүллээ.