“Хашаандаа сайхан амьдаръя” ТББ-аас АН-ын сонгуулийн мөрийн хөтөлбөрт тусгах санал хүргүүллээ

“Хашаандаа сайхан амьдаръя” ТББ-аас Ардчилсан намын 2024 оны УИХ-ын сонгуулийн мөрийн хөтөлбөрт тусгах санал хүргүүллээ

Уулзалтад Ардчилсан намын тэргүүн дэд дарга С.Баярцогт, Ардчилсан намын Стратеги бодлого, сургалт судалгааны газрын дарга Г.Дэнзэн, Нийслэлийн Ардчилсан намын дэд дарга, ҮБХ-ны гишүүн Ж.Энхбат нар оролцож, “Хашаандаа сайхан амьдаръя ТББ”-ын тэргүүн Ц.Түмэнбаяр, Б.Бат-Эрдэнэ нарын төлөөлөл гэр хорооллын бүтэц, төлөвлөлт, цаашид хэрхэн утаа, хөрсний бохирдол зэрэг гэр хороолол тойрсон асуудлуудыг шийдэх талаар танилцууллаа.

“Хашаандаа сайхан амьдаръя” ТББ-ын зүгээс улс орны ирээдүй, 25-32 насны 300 мянга гаруй залуу гадагш гарч ажиллахаар явжээ. Үүний цаана хамгийн том шалтгаан нь өөрийн гэсэн орон байртай болох юм. Монголчууд хамгийн олноороо амьдарч байгаа сууцыг зөв дулаалаад, зөв горимд оруулж чадвал утааг 40-50 хувиар бууруулах боломжтой юм. Гэвч утааг бууруулах хангалттай хэмжээний төсөв байгаа ч бодитой, үр ашигтай шийдэл хэрэгжүүлэхгүйн улмаас үр дүнд хүрэхгүй байна гэдгийг онцоллоо.

Утааг бууруулах, гэр хорооллын хөрсний бохирдлыг бууруулах нь нийслэл Улаанбаатар хотод төдийгүй 21 аймагт ч тулгамдаж байгаа томоохон асуудал бөгөөд нийслэлийн 50 хувь нь гэр хороололд амьдарч байгаа бол орон нутагт 10 хувь нь л орон сууцад амьдарч байна. Үүнийгээ дагаад нийслэлийн хэмжээнд 220 мянга орчим нүхэн жорлон байгааг стандартад нийцүүлэх бодит шаардлага байгаа талаар хэллээ.

Мөн Улаанбаатар хотын захын хороололд ажлын байр, үйлдвэрлэл хөгжөөгүйн улмаас тэнд амьдардаг хүмүүс хотын төв рүү ирж ажиллаж байна. Тиймээс иргэд, өрхийг жижиг дунд үйлдвэрлэл эрхлэх, ажлын байраар дэмжих шаардлага нэн тэргүүнд тулгамдаж байгааг онцоллоо.

Ардчилсан нам 2024 оны сонгуулийн мөрийн хөтөлбөртөө мэргэжлийн байгууллага, холбоод, салбар, салбарын экспертүүдийн бодлогын шийдлүүд, саналуудыг тусгахаар ажиллаж байна.