Өглөө.мн Шинэ өглөө, Шинэ мэдээлэл
Сонгуулийн ерөнхий хороо өчигдөр хуралдаж 2013 оны тайлангаа хэлэлцэж, ирэх оныхоо ажлын төлөвлөгөө, үйл ажиллагааныхаа чиглэлийг тодорхойлон баталжээ. СЕХ 2013 оны сонгуулийн бэлтгэлийг сайтар хангаж, сонгуулийн хуулийг чанд баримтлан сонгуулийг элдэв зөрчил маргаангүй, төсвийн ихээхэн хэмнэлттэйгээр зохион байгуулж, сонгууль эрх зүйн цоо шинэ орчинд явагдсан төдийгүй сонгуулийн бүхий л үйл ажиллагаанд орчин үеийн техник, технологиийг богино хугацаанд амжилттай нэвтрүүлсэн нь энэ удаагийн сонгуулийн онцлог болсон гэж дүгнэжээ.
Мөн энэ жил СЕХ Олон улсын сонгуулийн шагналын хороо нь 2013 оны шилдэг байгууллагаар сонгон шалгаруулж, сонгуулийг сайн зохион байгуулсныг нь өндөр үнэлж тэргүүн шагналаа хүртээсэн. Энэхүү шагнал нь Монгол Улсад сонгуулийн ардчиллыг жинхэнэ утгаар нь хэрэгжүүлж, иргэдийн сонгох, сонгогдох эрхийг бодитой хангаж буйн анхны том үнэлгээ боллоо гэдгийг СЕХ-ныхон онцолсон байна.
Ирэх онд Монгол Улсын Ерөнхийлөгчийн “Том төрөөс ухаалаг төр рүү” санаачилгыг дэмжиж энэ хүрээнд олсон ололт амжилтаа улам бататгаж сонгуулийн технологийг цаашид улам боловсронгуй болгох, сонгогчдын мэдлэг боловсролыг дээшлүүлэх, тэдний оролцоог идэвхжүүлэхэд чиглэсэн соён гэгээрүүлэх ажилд илүү анхаарах нь зүйтэй гэж үзсэн байна. Мөн сонгуулийн эрх зүйн орчинг боловсронгуй болгох, зөв гольдирлоор нь төлөвшүүлэхэд өөрсдийн саналаа бэлтгэхийн сацуу олон улсын харилцаагаа өргөжүүлэх зэрэг асуудалд ажлаа голчлон чиглүүлэхээр болсон байна.
